وفاقی دارالحکومت اسلام آباد اچ آندے 30 ݙینھ ساری پبلک ٹرانسپورٹ عوام کیتے مفت ہوسی، وفاقی وزیر داخلہ محسن نقوی

اسلام آباد۔ 3 اپریل (اے پی پی) وفاقی وزیر داخلہ محسن نقوی اعلان کیتے جو وزیراعظم شہباز شریف دی ہدایات تے وفاقی دارالحکومت اسلام آباد اچ آندے 30 ݙینھ کیتے ساری پبلک ٹرانسپورٹ عوام کیتے مفت کر ݙتی ویسی ۔ انھاں سماجی رابطے دی ویب سائٹ “ایکس” تے اپݨے بیان اچ آکھیا جو اے سہولت کل توں نافذ العمل ہوسی تے اسلام آباد دے سارے شہری ایندے توں فیدہ چا سڳسن۔ ایں اقدام دا مقصد ودھدے سفری خرچے پاروں شہریاں کوں وقتی ریلیف ݙیوݨ اے۔وزارتِ داخلہ موجب ہک مہینے دے ایں منصوبے تے تقریباً 35 کروڑ روپے دے خرچے آسن جیڑھے حکومت برداشت کریسی ۔ حکام دا آکھݨ اے جو اے اقدام عوام تے مالی ٻوجھ گھٹ کرݨ تے شہریاں کیتے سفری سہولتاں مزید سوکھیاں بݨاوݨ دے عزم دی عکاسی کریندے ۔ حکام موجب ایں سکیم توں روزانہ ہزاراں مسافراں کوں فیدہ پڄݨ دی توقع اے، جنھاں اچ طلباء، مزدور پیشہ لوک تے گھٹ آمدݨ آلا طبقہ شامل اے جیڑھا زیادہ تر پبلک ٹرانسپورٹ تے انحصار کریندن۔ پبلک ٹرانسپورٹ دے آپریشنز تے شامل روٹس متعلق مزید تفصیلات آندے ݙینھاں اچ جاری کیتے ونڄݨ دا امکان اے