شہید ذوالفقار علی بھٹو ایجھی پالیسیاں تے اداریں دی بنیاد رکھی جنھاں پاکستان دی سٹریٹجک سمت تے قومی سوچ کوں شکل ݙتی، صدرِ مملکت آصف علی زرداری دا شہید ذوالفقار علی بھٹو دی برسی دے موقع تے پیغام

اسلام آباد۔ 4 اپریل (اے پی پی)صدرِ مملکت آصف علی زرداری آکھیے جو اڄ اساں سابق وزیراعظم تے پاکستان پیپلز پارٹی دے بانی، شہید ذوالفقار علی بھٹو دی شہادت دی 47 ویں برسی منیندے پئیوں ، جنھاں دی زندگی 4 اپریل 1979 کوں جنرل ضیاء الحق دے مارشل لاء دور اچ چلائے ڳئے ہک مقدمے دے بعد ناحق ختم کرݙتی ڳئی۔ ایوانِ صدر دے پریس ونگ موجب صدرِ مملکت شہید ذوالفقار علی بھٹو دی برسی دے موقع تے اپݨے پیغام اچ آکھیا جو شہید ذوالفقارعلی بھٹو پاکستان دی سیاسی تاریخ اچ ہک مرکزی مقام رکھیندن، 1971 دے بعد دے اوکھے دور اچ انھاں دی قیادت قومی اعتماد کوں بحال کرݨ تے ملک کوں ہک نویں آئینی رستے تے پاوݨ اچ مدد کیتی۔انھاں آکھیا جو 1973 دے آئین دی منظوری، جیڑھا اڄ وی اساݙے پارلیمانی نظام دی رہنمائی کریندا پئے، ایں دور دی ساریں توں پائیدار کامیابیاں اچوں ہک اے۔ انھاں دی حکومت ایجھی پالیسیاں تے اداریں دی بنیاد وی رکھی جنھاں آوݨ آلے سالاں اچ پاکستان دی سٹریٹجک سمت تے قومی سوچ کوں شکل ݙتی اے۔ صدرِ مملکت آکھیا جو تقریباً ادھ صدی بعد انھاں دی غیر منصفانہ، غیر قانونی تے غیر آئینی پھاسی دے حوالے نال سپریم کورٹ آف پاکستان 6 مارچ 2024 کوں اپݨے فیصلے اچ قرار ݙتا جو شہید ذوالفقار علی بھٹو کوں منصفانہ ٹرائل تے قانونی تقاضیں دا حق کائنی ݙتا ڳیا۔ انھاں آکھیا جو عدالت مشاہدہ کیتا جو قانونی کارروائی “منصفانہ ٹرائل تے ضابطہ قانون دی ہر جھلک کوں ختم کرݙتا تے اے ظاہر کیتا جو ہک بے گناہ شخص کوں تکھے تکھے تختہ دار تئیں پڄا ݙتا ڳیا۔صدر آصف علی زرداری آکھیے جو عدالت دی رائے اچ منصفانہ طریقہ کار توں کئی سنگین انحرافات دی نشاندہی کیتی ڳئی، قتل دی تفتیش مئی 1976 اچ باضابطہ طور تے بند کر ݙتی ڳئی ہئی کیوں جو پولیس تے تحقیقاتی ادارے ملزمان دا تعین کرݨ اچ ناکام رہیے ہن تاں جو 5 جولائی 1977 دے فوراً بعد جݙاں جنرل ضیاء الحق مارشل لاء دے ذریعے حکومت دا تختہ الٹیا، کیس کوں بغیر قانونی اجازت دے ول کھول ݙتا ڳیا۔ ایں مقدمے کوں غیر معمولی طریقے نال لاہور ہائی کورٹ منتقل کیتا ڳئے، بغیر ملزم کوں اطلاع ݙتے جیندے توں او”ہک اپیل دے حق” توں محروم تھی ڳئے تے اہم قانونی تحفظات کوں غیر موثر بݨا ݙتا ڳیا جنھاں اچ ضابطہ فوجداری دی دفعہ 376 دے تحت اے لازمی شرط وی شامل ہئی جو ہر سزائے موت دی توثیق ہائی کورٹ کرے۔ صدرِمملکت آکھیا جو عدالت نوٹ کیتا جو ایں شق کوں “صرف ہک واری نظر انداز کیتا ڳیا تے او ایہو مقدمہ ہئی۔انھاں آکھیا جو 1979 اچ انھاں دی پھاسی پاکستان توں ٻاہر وی تشویش پیدا کیتی، جتھاں کئی عالمی رہنماواں تے مبصرین مقدمے تے سزا دے حالات تے بے چینی دا اظہار کیتا۔ ایں طرح اے واقعہ نہ صرف پاکستان دی اندرلی سیاسی تاریخ اچ بلکہ انصاف، قانون تے سیاسی اختیار متعلق عالمی مباحث اچ وی اہم مقام رکھیندے۔ صدرِ مملکت آکھیا جو اے ݙینھ اساکوں یاد ݙویندے جو انصاف تے ضابطہ قانون محض نظریاتی اصول کائنی، انھاں دی موجودگی یا عدم موجودگی شہریاں دی روزانہ دی زندگی اچ محسوس کیتی ویندی اے، بھاویں او عدالتاں، عوامی دفتراں، کم دیاں جہیں یا سکولاں اچ ہوون۔ جݙاں ادارے منصفانہ تے قانون موجب کم کریندن تاں شہریاں کوں یقین ہوندے جو انھاں دے حقوق محفوظ رہسن لیکن جݙاں اے معیار کمزور تھیندن تاں ایندے اثرات ساریں توں زیادہ عام لوکاں تے پوندن۔صدرِ مملکت آکھیا جو آؤ اساں شہید محترمہ بینظیر بھٹو دی جرات تے قربانی کوں وی یاد کروں جنھاں اپݨی اماں بیگم نصرت بھٹو دے نال رل تے سیاسی جبر، قید و بند تے جلاوطنی دے دور اچ ایں جدوجہد کوں اڳوں ودھایا۔ جمہوری مزاحمت تے مسلسل جدوجہد خصوصاً تحریکِ بحالیِ جمہوریت دے ذریعے انھاں پاکستان اچ آئینی نظام دی بحالی دی کوشش جاری رکھی تے بالآخر جمہوری اقدار دی خاطر اپݨی جان دا نذرانہ پیش کیتا۔ صدر آصف علی زرداری آکھیا جو بطور قوم اساکوں اپݨی تاریخ دے ایں باب توں واضح سبق حاصل کرݨے چاہیدن۔ اساݙے اداریں تے اے مستقل ذمہ داری عائد تھیندی اے جو او قانون دی حکمرانی کوں یقینی بݨاون، قانونی تقاضیں دا تحفظ کرن تے انصاف ݙیوݨ کوں غیر جانبدار تے منصفانہ بݨاون۔ انھاں آکھیا جو ایہواصول اساݙی جمہوریت دی مضبوطی تے عوام دے ریاستی اداریں تے اعتماد کیتے ناگزیر اے