دنیا اچ تیل دا بحران اے، حکومت دے وقتی اقدامات پاروں ملک اچ تیل دا بحران پیدا نی تھیوݨ ݙتا ڳیا، پبلک تے گڈز ٹرانسپورٹ کوں سبسڈی ملݨ نال عوام کوں مزید ریلیف ملسی، عطا اللہ تارڑ

لاہور۔ 4 اپریل (اے پی پی) وفاقی وزیر اطلاعات و نشریات عطا اللہ تارڑ آکھیے جو دنیا اچ تیل دا بحران اے، تاریخ اچ عالمی سطح تے تیل دی قیمتاں اچ اتنا ودھارا کݙاہیں نی تھیا، حکومتی اقدامات پاروں ملک اچ تیل دا بحران پیدا نی تھیوݨ ݙتا ڳیا، وزیراعظم عوامی ریلیف کیتے پیٹرول تے لڳی لیوی اچ 80 روپے تئیں گھٹکی کیتی اے، پبلک تے گڈز ٹرانسپورٹ کوں سبسڈی ملݨ نال عوام کوں مزید ریلیف ملسی، کفایت شعاری تے وزیراعظم روزانہ دی بنیاد تے وزارتاں توں رپورٹ منڳدن۔اے ڳالھ انہاں وفاقی وزیرماحولیاتی تبدیلی ڈاکٹر مصدق ملک دے رلے نیوز کانفرنس نال خطاب کریندے آکھی۔ وفاقی وزیر اطلاعات آکھیا جو تیل دا بحران عالمی سطح تے درپیش اے جیندے نال سارے ملک متاثر تھیندے پئن، تاں جو وزیراعظم دی ہدایات تے متعلقہ وزارتاں شروع اچ ہی پیشگی اقدامات کریندے ملک اچ پیٹرولیم مصنوعات دی بلا تعطل فراہمی کوں یقینی بݨائے۔ انھاں آکھیا جو وزیراعظم کشیدگی دے آغاز تے ہی واضح ہدایات جاری کیتیاں جو کہیں صورت ملک دے کسان، نوکری پیشہ لوک، تریمتاں تے او نینگر جیڑھے اپݨے گھر آلیں دیاں ضرورتاں پوریاں کرݨ کیتے رزقِ حلال کمیندن، انھاں کوں تیل دی قلت دا سامݨا نئیں ہووݨا چاہیدا۔انھاں آکھیا جو پورے خطے اچ پیٹرولیم مصنوعات دی قلت ݙیکھݨ اچ آئی جݙاں جو مشرقی ہمسایہ ملک اچ پیٹرول پمپاں تے لمبیاں قطاراں لڳیاں تے ایندھن دی دستیابی متاثر تھئی، تاں جو حکومتِ پاکستان وقتی حکمتِ عملی دے تحت عوام کیتے پیٹرول تے ڈیزل ݙیوݨ دا بندوبست کیتے۔ عید دے ݙینھاں اچ ملکی بندرگاہواں تے بحری جہازاں دی آمد دے مناظر سوشل میڈیا تے وی نظر آندے رہین ، مختلف ذرائع توں پیٹرولیم مصنوعات منگوائیاں ڳئیاں، ݙو جہاز آبنائے ہرمز دے ذریعے پڄے جݙاں جو ریڈ سی (بحیرہ احمر) دے رستے وی انتظامات کیتے ڳئن۔ انھاں آکھیا جو متحدہ عرب امارات دے فجیرہ تے سعودی عرب سودھے جتھوں جتھوں ممکن تھیا عوامی ضرورت کوں سامݨے رکھیندے تیل دی دستیابی یقینی بݨائی ڳئی اے۔ انھاں آکھیا جو وزیراعظم وقتی نوٹس ڳھدا جیں پاروں ملک اچ کہیں وی جاہ تے تیل دی قلت پیدا نی تھیوݨ ݙتی ڳئی۔انھاں آکھیا جو جنگ پاروں سپلائی لائنز متاثر تھئیاں جیندے نال بین الاقوامی منڈی اچ قیمتاں اچ نمایاں ودھارا تھیا تے عالمی سطح تے قیمتاں غیر معمولی حد تائیں بلند تھی ڳئیاں۔ انھاں آکھیا جو پیٹرولیم مصنوعات دے استعمال اچ ٻہوں احتیاط دی لوڑھ اے، صرف ضرورت موجب ہی تیل استعمال کیتا ونڄے۔ انھاں آکھیا جو سبسڈی دے پچھوں وزیراعظم تے انھاں دی ٹیم دی مسلسل محنت شامل ہئی۔ ایں حوالے نال ݙینھ رات کم کریندے جامع حکمتِ عملی بݨائی ڳئی اے۔ انھاں آکھیا جو ایں عرصے اچ جݙاں دنیا تے خطے دے مختلف ملکاں اچ عوام کوں پیٹرول دی قلت تے پمپاں تے لمبیاں قطاراں دا سامݨا ہئی، وزیراعظم ترائے ہفتے دے دوران قیمتاں دا ٻوجھ عوام تے منتقل نئیں تھیوݨ ݙتا۔انھاں آکھیا جو حکومت بچت تے کفایت شعاری دے اقدامات نال 129 ارب روپے دا انتظام کیتا تے ترائے ہفتے تئیں پیٹرول دی قیمتاں اچ ودھارا نی تھیوݨ ݙتا ڳیا ۔ وفاقی وزیر آکھیا جو وزیراعظم پیٹرول دے استعمال اچ کمی دیاں ہدایات جاری کیتیاں، سرکاری سطح تے 50 فیصد پیٹرول دی بچت تے غیر ضروری گاݙیاں دے استعمال اچ نمایاں کمی کیتی ڳئی، وزراء تے مشیراں دی تنخواہواں سودھے ترقیاتی منصوبیں توں وی فنڈز کڈھئے ڳئن۔ انھاں آکھیا جو وزیراعظم واضح کیتا جو عید دے موقع تے عوام کوں اضافی ٻوجھ دا سامݨا نہ کرݨ ݙتا ویسی جیندے نتیجے اچ عید دے ݙینہاں اچ قیمتاں مستحکم رہیاں تے عوام کوں ریلیف ݙتا ڳیا۔وفاقی وزیر اطلاعات آکھیا جو موجودہ حالات اساݙے پیدا کیتے کائنی بلکہ دنیا دے سارے ملک ایں صورتحال دا سامݨا کریندے پئن۔ انھاں آکھیا جو جݙاں کشیدگی اچ ودھارا تھیا تاں قومی سطح تے نیشنل رسپانس دی لوڑھ ہئی، وزیراعظم چارے صوبیں دے وزرائے اعلیٰ، وزیراعظم آزاد کشمیر تے وزیراعلیٰ گلگت بلتستان سودھے سارے حکام کوں کٹھا کیتا جتھاں قومی سطح دے ردِ عمل تے اتفاق کیتا ڳئے۔ انھاں آکھیا جو جتنا ٻوجھ چاوݨ ممکن ہئی، حکومت چاتا، صورتحال نال نبٹݨ کیتے مشترکہ حکمتِ عملی اپناوݨ دی لوڑھ اے، ایں قومی ردِ عمل دے تحت وفاقی و صوبائی حکومتاں مشترکہ طور تے ٻوجھ برداشت کریندیاں پئن جݙاں جو محروم تے مستحق طبقیں دے تحفظ کیتے خصوصی اقدامات کیتے ویندے پئن۔وفاقی وزیر آکھیا جو عام سبسڈی دی صورت اچ مہانگیاں گاݙیاں استعمال کرݨ آلے لوک وی اتنا ہی فیدہ چیندن جتنا موٹر سائیکل استعمال کرݨ آلا عام شہری حاصل کریندے ۔ ایہو وجہ اے جو ٹارگٹڈ سبسڈی دا نظام بݨایا ڳئے تاں جو ریلیف اصل مستحق طبقیں تئیں پڄ سڳے۔ انھاں آکھیا جو پیٹرولیم مصنوعات دی قیمتاں اچ ودھارے نال گڈز تے پبلک ٹرانسپورٹ دے کرائے اچ ودھارا تھیندے، تاں جو حکومت وقتی اقدامات کریندے اسلام آباد تے پنجاب اچ کرائے اچ ودھارا روک ݙتے تے عوام کوں ریلیف ݙیوݨ کیتے پبلک ٹرانسپورٹ کوں مفت کر ݙتا ڳئے۔ وفاقی وزیر آکھیا جو سندھ حکومت وی کرائے اچ ودھارا روکݨ دا فیصلہ کیتے۔ انھاں آکھیا جو ٹرکاں، بساں تے ویناں کیتے ݙتی ونڄݨ آلی سبسڈی نال وی عام آدمی کوں براہِ راست سہولت ملسی۔وفاقی وزیر آکھیا جو وزیراعظم شہباز شریف اوکھے حالات اچ ہمت نی ہری تے واضح کیتا جو او ایں ویلھے تئیں آرام دے نال نہ ٻہسن جݙاں تئیں عوام خود کوں محفوظ محسوس نہ کرن ۔ انھاں آکھیا جو وزیراعظم چھیکڑی لمحے تئیں پیٹرولیم مصنوعات دے پرائسنگ فارمولے تے کم کریندے رہیے تے ایں عزم دا اظہار کیتا جو پیٹرول دی قیمتاں اچ مزید کمی دا رستہ کڈھیا ویسی ۔ انھاں آکھیا جو نیک نیتی تے مسلسل محنت نال ہی حل نکلدن تے اللہ تعالیٰ دی مدد شاملِ حال ہوندی اے۔ وفاقی وزیر اطلاعات آکھیا جو تیل دی قیمتاں اچ ودھارے دے بعد وزیراعظم پیٹرولیم لیوی اچ 80 روپے گھٹکی کیتی جیندے نتیجے اچ 458 روپے فی لیٹر تئیں پڄݨ آلا پیٹرول گھٹ تھی تے 378 روپے فی لیٹر تے دستیاب تھئے۔انھاں آکھیا جو صورتحال دا مسلسل جائزہ ڳھدا ویندا پئے تے روزانہ دی بنیاد تے جائزہ اجلاس تھیندن جیندے اچ وزیراعظم متعلقہ وزارتاں دی کارکردگی ݙیکھدن۔ انھاں آکھیا جو وزیراعظم دی قیادت اچ وفاقی و صوبائی حکومتاں عوامی بھلائی کیتے سارے اقدامات کریندیاں پئن جݙاں جو سفارتی سطح تے وی کوششاں جاری ہن، عوام کوں کہیں صورت اچ کلہا کائناں چھوڑیا ویسی۔انھاں آکھیا جو پبلک ٹرانسپورٹ تے گڈز ٹرانسپورٹ کوں سبسڈی ݙتی ویسی، ایں مقصد کیتے وزیراعظم ڈیجیٹل والٹ دا نظام متعارف کراوݨ دیاں ہدایات جاری کیتن جیندے تحت ڈائریکٹ کیش ٹرانسفر کیتا ویسی ۔ انھاں آکھیا جو اے ادائیگیاں ایں شفاف طریقے نال تھیسن جیویں رمضان المبارک دے دوران براہِ راست کیش ٹرانسفر کیتا ڳیا ہئی۔وفاقی وزیر آکھیا جو حکومت دی کوششاں جاری ہن تے عوام کوں ریلیف ݙیوݨ کیتے ݙینھ رات کم کیتا ویندا پئے ۔ انھاں آکھیا جو وزیراعظم ایں معاملے تے پوری طرح متحرک ہن تے حکومت دی اولین ترجیح عوام کوں ممکنہ اوکھ توں محفوظ رکھݨ اے۔ انھاں آکھیا جو دعا اے جو خطے اچ امن بحال تھیوے تاں جو حالات معمول تے آون تے پاکستان اچ ترقی دا سفر تکھا جاری رہ سڳے۔ انھاں آکھیا جو اوکھے حالات دے باوجود حکومت عوام دے نال کھڑی اے جݙاں جو وزیراعظم ساریاں وفاقی وزارتاں تے صوبائی حکومتاں کوں ہدایات جاری کیتیاں جو عوام کیتے ودھ توں ودھ سہولت پیدا کیتی ونڄے۔ ایں مقصد کیتے سارے ادارے متحرک ہن، کوئی وی بندہ آرام نال کائنی ٻیٹھا تے ہر سطح تے بھرپور کوششاں جاری ہن۔ انھاں آکھیا جو انشاء اللہ عوام کوں اوکھ توں بچاوݨ کیتے حکومت ہر ممکن اقدام کریسی۔