وفاقی پولیس اچ الیکٹرک وہیکلز دے استعمال دا آغاز خوش آئند اے، قیمتی زرِ مبادلہ دی بچت تھیسی، وزیراعظم شہباز شریف

اسلام آباد۔ 6 اپریل (اے پی پی) وزیراعظم محمد شہباز شریف وفاقی دارالحکومت اسلام آباد اچ پولیس ولوں الیکٹرک وہیکلز دے استعمال دے آغاز کوں خوش آئند تے صوبیاں تے قانون نافذ کرݨ آلے اداریاں کیتے قابلِ تقلید قرار ݙیندیں ہوئیں آکھیا جو ایندے نال قیمتی زرِ مبادلہ دی بچت تھیسی ۔ او سنوار کوں اسلام آباد کیپیٹل ٹیریٹری ٹریفک پولیس کوں ماحول دوست الیکٹرک وہیکلز دی فراہمی دی تقریب نال بطور مہمانِ خصوصی خطاب کریندے پئے ہن ۔ ایں موقع تے وفاقی وزیرِ داخلہ محسن نقوی تے وفاقی وزیرِ اطلاعات و نشریات عطا اللہ تارڑ دے علاوہ اسلام آباد پولیس تے ضلعی انتظامیہ دے اعلیٰ حکام وی موجود ہن۔ وزیراعظم آکھیا جو انھاں کوں خوشی اے جو اسلام آباد پولیس ولوں ٹریفک تے امن و امان دے قیام کیتے الیکٹرک وہیکلز دے استعمال دا آغاز تھیے، ایندے نال قیمتی زرِ مبادلہ دی بچت تھیسی جیڑھی اج کل دے حالات اچ جݙاں جو پٹرول دی قیمتاں اسمان نال ڳالھیں کریندیاں پئن بالخصوص ٻہوں زیادہ اہمیت دی حامل اے۔ وزیراعظم ایں امید دا اظہار کیتا جو پورے ملک دے قانون نافذ کرݨ آلے ادارے تے صوبائی حکومتاں وی ایندی تقلید کریسن اتے الیکٹرک وہیکلز دا آغاز کریسن۔ ایندے توں پہلے انھاں الیکٹرک وہیکلز دا معائنہ کیتا۔ واضح راہوے جو حکومت دی دوراندیش پالیسی پاروں خلیج دا بحران شروع تھیوݨ توں پہلے ای فیول اکانومی تے برقی گاݙیاں دی پالیسی تے کم شروع تھی ڳئیا ہئی اتے کجھ مہینے پہلے انھاں گاݙیاں دی پروکیورمنٹ دا آغاز کر ݙتا ڳیا ہئی۔ آئی جی اسلام آباد پولیس سید علی ناصر رضوی وزیراعظم کوں بریفنگ اچ ݙسایا جو شروع اچ اسلام آباد ٹریفک پولیس کوں 15 ماحول دوست ایکو-سمارٹ الیکٹرک وہیکلز دی فراہمی وزیراعظم دے وژن تے حکومت دی توانائی بچت دی پالیسی دا حصہ اے، ہر گاݙی کیتے ہک کپتان، ہک مرد رسپانڈر، ہک رسپانڈر تے ہک ڈرائیور دا سٹاف ہوسی جنھاں کیتے خصوصی وردیاں ہوسن ۔ اے گاݙیاں شہر دی اہم شاہراہواں تے موجود رہسن تاںجو ٹریفک دا بہاؤ ٻیا بہتر بݨایا ونڃ سڳے۔ انھاں ݙسایا جو مکمل طور تے چارج ہک گاݙی 350 توں 400 کلو میٹر دا فاصلہ طے کر سڳدی اے۔ تیز ترین چارجنگ 60 توں 90 منٹ جݙاں جو ریگولر چارجنگ کیتے 6 توں 8 گھنٹے درکار ہوسن ۔ پٹرول تے چلݨ آلی گاݙیاں دے مقابلے اچ انھاں گاݙیاں دے استعمال نال فی گاݙی 0.55 ملین روپے ماہانہ دی بچت تھیسی اے برقی گاݙیاں 13 توں 14 مہینیاں اچ آپݨی لاگت پوری کر گھنسن ۔ بریفنگ دے مطابق جلدی 15 ٻئی الیکٹرک وہیکلز اسلام آباد ٹریفک پولیس دی فلیٹ اچ شامل تھی ویسن ۔ انھاں آکھیا جو اسلام آباد ٹریفک پولیس دی فلیٹ اچ انھاں برقی گاݙیاں دی شمولیت وفاقی حکومت دے اسلام آباد اچ جدید ٹریفک مینجمنٹ پلان دا حصہ اے۔