ایران جنگ دی وجہ توں عالمی مارکیٹ اچ تیل دی قیمتاں اچ ودھارے تے آبنائے ہرمز دی بندش نال دستیابی اچ تعطل دا بوجھ عوام تے نئی پاوݨ ݙتا ڳیا، وفاقی وزیرِ پٹرولیم علی پرویز ملک دی قومی اسمبلی اچ بریفنگ

اسلام آباد۔ 6 اپریل (اے پی پی) وفاقی وزیرِ پٹرولیم علی پرویز ملک آکھیا جو پاکستان توانائی دی ضروریات پوریاں کرݨ کیتے 80 فیصد تیل درآمد کریندے ۔ ایران جنگ دی وجہ توں عالمی مارکیٹ اچ تیل دی قیمتاں اچ ودھارے تے آبنائے ہرمز دی بندش نال دستیابی اچ تعطل دا بوجھ عوام تے نئی پووݨ ݙتا ڳیا۔ ساری اکائیاں کوں اعتماد اچ گھن تے اڄوکی پٹرولیم مصنوعات دی قیمتاں اچ اضافہ کیتا ڳیا اتے نال ای متوسط طبقے کوں ریلیف ݙتا ڳئے۔ ڈیجیٹل والٹس دے ذریعے پٹرولیم مصنوعات تے سبسڈی فراہم کیتی ویندی پئی اے۔ خطے اچ کشیدگی دے باوجود عوام کوں بلا تعطل پٹرول فراہم کیتا ویندا پئے ۔ خطے اچ امن و استحکام کیتے پاکستان بھرپور کردار ادا کریندا پئے۔ چھوٹے کساناں کوں 1500 روپے فی ایکڑ سبسڈی ݙتی ویندی پئی اے۔ روٹ متاثر تھیوݨ دی وجہ توں شپمنٹ دے کرایاں اچ لکھاں ڈالر اضافہ تھیا۔ سنوار کوں قومی اسمبلی اچ ملک اچ پٹرولیم مصنوعات دی قیمتاں اچ ودھارے، عام آدمی کیتے حکومتی ریلیف دے اقدامات تے ایں صورتحال اچ وفاقی اکائیاں نال رل تے کیتے ونڃݨ آلے کماں متعلق بریفنگ ݙیندے ہوئیں ݙسایا جو پاکستان آپݨی توانائی دی ضرورت دا 80 فیصد درآمد نال پورا کریندے ۔ خطے دی موجودہ صورتحال پورے خطے کوں اپݨی ولھیٹ اچ ڳھن ڳھدے جیندے اثرات پوری دنیا تے تھیندے پئن۔ اساݙی حکومت انھاں حالات اچ آپݨی ذمہ داریاں پوریاں کیتن، مقبول فصیلیاں دے بجائے حقیقی اقدامات چاتن، اگر اے فیصلے نہ کریندے تاں پاکستان 2022ء آلی جاہ تے پڄ ویندا۔ انھاں ݙسایا جو 28 فروری کوں ایران تے حملے دے بعد آبنائے ہرمز توں آمد و رفت اچ خلل پیا، دنیا کوں 15 توں 20 فیصد پٹرولیم مصنوعات سمیت ٻئی توانائی بارے مصنوعات ایں رستے توں ویندن۔ کچا تیل، پٹرول، ایل پی جی، ڈیزل، ایل این جی تے فرٹیلائزر سمیت کیمیکل دی آمد و رفت اسے رستے توں تھیندی اے، اتھاں رکاوٹ دی وجہ توں دنیا اچ انھاں دی قیمتاں اچ کئی گنا اضافہ تھیے۔ اساں ایجھی صورتحال اچ اے فیصلہ کرݨا ہئی جو کیا آپݨی عوام کیتے پٹرولیم مصنوعات دی دستیابی کوں یقینی بݨاوݨا اے یا پڑوسی ملکاں وانڳوں لمبی قطاراں تے لڑائی جھگڑے پیدا کرݨے ہن۔ انھاں ݙسایا جو حکومت وسائل دی دستیابی تائیں پٹرولیم قیمتاں اچ اضافہ کائنی کیتا اتے عوام کوں ہفتہ وار 50 توں 60 ارب روپے دی سبسڈی ݙتی، کفایت شعاری تے ترقیاتی فنڈز توں رقم منتقل کیتی، منافع بخش اداریاں توں وی وسائل گھن تے 100 ارب روپے تائیں دا ریلیف ݙتا ڳیا۔ انھاں آکھیا جو ݙو، ترائے ہفتے صورتحال اینویں چلدی رہی، اساں آئی ایم ایف دے نال پروگرام اچ ہیں، دنیا اچ کروڈ آئل دی قیمت فی بیرل 70 ڈالر توں ودھ تے تاریخ دی بلند ترین سطح 170 ڈالر تائیں وی ڳئی جیندے نال حکومتی وسائل تے بوجھ ودھ ڳیا۔ اساں ݙو، ترائے سال دے استحکام کوں مدِ نظر رکھ تے کچے تیل اچ اضافے دے بعد وݙی تکلیف نال ڈیزل دی قیمتاں اچ اضافہ کیتا، ڈیزل دی قیمتاں 88 ڈالر فی بیرل توں ودھ تے 290 توں 300 ڈالر فی بیرل تائیں پڄ ڳئن۔ پاکستان 50 سال توں ڈیزل کویت توں درآمد کریندا پئے جتھاں اینکوں پنج ڈالر پریمیئر تے تقریباً ہک ڈالر کرایہ پوندا ہئی، لیکن اے ساری سپلائی ہک ݙینہہ اچ ختم تھی ڳئی۔ وزیراعظم فوراً خلیجی ملکاں دے سربراہاں نال ڳالھ کیتی اتے ایندا حل کڈھیا۔ اساݙی ایل این جی دی ساری سپلائی قطر توں تھیندی پئی ہئی، آبنائے ہرمز دی بندش نال ایندی سپلائی ختم تھی ڳئی لیکن اساں گیس گھن آوݨ کیتے اقدامات چاتے، عوام تے گھٹ توں گھٹ بوجھ پاوݨ کیتے وزرائے اعلیٰ نال مشاورت کیتی، ولا ایوانِ صدر اچ ساری اکائیاں دا اجلاس سݙوایا ڳیا۔ اساں مشاورت نال کسان، تاجر، پبلک ٹرانسپورٹ، موٹر سائیکلاں سمیت کمزور طبقات کوں تحفظ ݙیوݨ تے غور کیتا، بھرپور مشاورت تے صوبائی وزرائے اعلیٰ تے فیلڈ مارشل سمیت سارے احباب دی مشاورت نال ترجیحات دا تعین کیتا ڳیا، ساریاں کوں ہکو صفحے تے گھن آ تے وزیراعظم ٹارگٹڈ سبسڈی دے نال قیمتاں اچ ردوبدل دا فیصلہ کیتا۔ حکومت ولوں ݙتی ونڃݨ آلی سبسڈی توں صاحبِ حیثیت لوگ ودھ فائدہ چیندے پئن، آئی ایم ایف پروگرام دے تحت معیشت دے استحکام تے اینکوں پائیدار ترقی دی راہ تے رکھیندے ہوئیں عام آدمی تائیں ریلیف پڄاوݨ دے اقدامات دا فیصلہ تھیا۔ صدرِ مملکت ایں سارے عمل دی نگرانی کیتی، تمام وزرائے اعلیٰ ولوں ایں صورتحال اچ بھرپور تعاون تے انھاں دا شکریہ ادا کریندوں، اتحادی جماعتاں تے بلاول بھٹو زرداری دے وی شکر گزار ہیسے جنھاں مکمل تعاون کیتا۔ انھاں ݙسایا جو قیمتاں اچ اضافے دے نال نال اساں سبسڈی دا وی اعلان کیتا، انفارمیشن منسٹری ولوں ای-والٹس دے ذریعے مستحق لوکاں کوں باعزت طریقے نال سبسڈی دا انتظام کیتا ڳیا جیندے بعد ایکسائز دے کول رجسٹرڈ لکھاں لوکاں کوں پیسے منتقل کیتے ڳئے۔ انھاں آکھیا جو پاکستان دے تیل دا 90 فیصد آبنائے ہرمز دے رستے آندے، سعودی عرب دے شکر گزار ہیسے جو اونھاں آبنائے ہرمز دی بندش دے بعد معمول توں ہٹ تے بلا تعطل یمبو پورٹ دے ذریعے تیل مہیا کیتا، فوجیرا تے اومان توں وی تیل دے جہاز پڄدے پئے ہن، انھاں سب دا شکریہ ادا کریندے ہیں، قیمتاں اچ اضافہ ضرور اے پر تیل دی دستیابی اچ کوئی رکاوٹ کائنی۔ انھاں آکھیا جو مقامی آئل تے گیس کمپنیاں نے وی اپݨی گیس دی فراہمی اچ نمایاں اضافہ کیتا جیندے نال کھاݨے دے اوقات اچ گیس دی دستیابی ممکن تھئی۔ وفاقی وزیر آکھیا جو دنیا اچ تیل دے بحران توں وی ٻڈا بحران کھاد دی دستیابی دا اے، وزیراعظم خصوصی ہدایت کیتی جو کھاد دی فراہمی کوں یقینی بݨایا ونڃے، اساݙے پڑوسی ملک اچ کھاد دی قیمتاں اچ کئی گنا اضافہ تھیا پر پاکستان اچ کھاد بݨاوݨ آلی 10 فیکٹریاں کوں بلا تعطل گیس دی فراہمی یقینی بݨیندے پئیوں اتے انھاں کوں پابند کیتے جو فی بوری قیمت 4500 روپے توں اتے کائنی ہوسی۔ علی پرویز ملک آکھیا جو حکومت ایران دی شکر گزار اے جو انھاں آبنائے ہرمز اچ پھسے اساݙے ݙو جہازاں کوں محفوظ رستہ ݙتا، ایرانی حکومت نے سارے گلے شکوے ہک پاسے رکھ تے پاکستان دے جنگ بندی دے کردار کوں ݙیکھدے ہوئیں انھاں جہازاں کوں گزرݨ دی اجازت ݙتی۔ انھاں وزارتِ بحری امور تے وزارتِ انفارمیشن ٹیکنالوجی دا وی شکریہ ادا کیتا جنھاں اپݨے سارے وسائل فعال کیتے۔ صوبیاں انٹرسٹی سفری سہولیات مفت کرݨ دا اعلان کیتے، وفاقی حکومت وی اسلام آباد اچ چلݨ آلی سرکاری ٹرانسپورٹ مفت کیتی اے۔ صوبیاں دی مشاورت نال ٹیوب ویلاں تے ٹریکٹراں کوں وی کسان کارڈ، ہاری کارڈ تے کے پی ورلڈ بینک دے لینڈ ریکارڈ کوں مدِ نظر رکھیندے ہوئیں سبسڈی ݙتی ویندی پئی اے۔ 25 ایکڑ دی حد تائیں دے کاشتکار کوں 1500 روپے فی ایکڑ سبسڈی ݙتی ویندی پئی اے، اسلام آباد، آزاد کشمیر تے گلگت بلتستان اچ ایندی ذمہ داری وفاق نے گھدی اے۔ انھاں آکھیا جو اتنے وݙے بحران اچ حکومت عوام دی مشکلاں کوں مدِ نظر رکھیندے ہوئیں فیصلے کیتن، خطرات دے تدارک کیتے منصوبہ بندی کیتی اے، خیبر پختونخوا تے بلوچستان اچ مارکیٹاں رات 8 وڄے بند کرݨ دے فیصلے اچ پہل کیتی ڳئی اے جیندے تے انھاں دے مشکور ہیسے۔ ایندے نال توانائی دی پیداوار کیتے فرنس آئل دا استعمال کائنی تھیسی، امید اے جو ٻئے صوبے وی جلدی ایندا فیصلہ کریسن اے۔