صدرِ مملکت آصف علی زرداری کوں کیوبا، ایتھوپیا، پرتگال، سپین تے تنزانیہ دے نامزد سفیراں، سنگاپور دے نامزد ہائی کمشنر سفارتی اسناد پیش کیتی

اسلام آباد۔ 7 اپریل (اے پی پی) صدرِ مملکت آصف علی زرداری کوں کیوبا، ایتھوپیا، پرتگال، سپین تے تنزانیہ دے نامزد سفیراں جݙاں جو سنگاپور دے نامزد ہائی کمشنر منگل دے ݙینہہ ایوانِ صدر اچ آپݨی سفارتی اسناد پیش کیتن۔ صدرِ مملکت سفیراں کوں پاکستان اچ آپݨی سفارتی ذمہ واریاں دے آغاز تے مبارکباد ݙتی اتے انھاں کیتے نیک تمناواں دا اظہار کیتا ۔ انھاں امید ظاہر کیتی جو انھاں دی تقرریاں ݙو پاسہ تعلقات دے استحکام تے آپسی دلچسپی دے شعبیاں اچ تعاون دے فروغ اچ معاون ثابت تھیسن ۔ ایوانِ صدر دے پریس ونگ توں جاری تھئیے بیان دے مطابق کیوبا دے نامزد سفیر ڈیمین کورڈیرو ٹورس نال ملاقات اچ صدر ݙوہیں ملکاں وچال دیرینہ تے دوستانہ تعلقات دی توثیق کیتی اے۔ انھاں صحت تے تعلیم دے شعبیاں اچ کیوبا دے تعاون بالخصوص میڈیکل سکالرشپس کوں سراہیا اتے صحت، بائیوٹیکنالوجی تے سیاحت دے شعبیاں اچ تعاون دے امکانات تے زور ݙتا، نال ای کثیرالجہتی فورمز تے جاری اشتراک کوں وی اہم قرار ݙتے ۔ صدرِ مملکت 2005 دے زلزلے دے دوران کیوبا ولوں فراہم کردہ امداد تے گہری قدردانی دا اظہار کیتا اتے آکھیا جو اے انسانی ہمدردی تے مبنی تعاون ݙوہیں ملکاں دے درمیان یکجہتی دی ہک دیرپا علامت اے۔ ایتھوپیا دے نامزد سفیر ڈاکٹر عمر حسین اوبا نال ملاقات اچ صدر اسلام آباد اچ ایتھوپیا دے سفارتخانے دے قیام تے براہِ راست پروازاں دی بحالی دا خیرمقدم کیتے ۔ انھاں ݙوہیں ملکاں وچال ودھدے ہوئے رابطیاں دا ذکر کریندیں ہوئیں تجارت، ہوا بازی، تعلیم تے ٹیکنالوجی دے شعبیاں اچ تعاون کوں ٻیا ودھاوݨ دی لوڑھ تے زور ݙتا ۔ پرتگال دے نامزد سفیر پاؤلو میگوئل گوئیدس دومینگش نال ملاقات اچ صدر پرتگال دے نال ݙو پاسہ اتے یورپی یونین دے فریم ورک دے تحت تعلقات دی اہمیت تے زور ݙتے ۔ انھاں تجارت اچ مثبت پیشرفت کوں سراہندیں ہوئیں سرمایہ کاری، آئی ٹی، زراعت تے بلیو اکانومی دے شعبیاں اچ تعاون ودھاوݨ دی لوڑھ تے زور ݙتا جݙاں جو پاکستانی کمیونٹی دے کردار، لیبر موبیلیٹی تے تعلیمی تبادلیاں دے امکانات کوں وی اجاگر کیتا۔ سپین دے نامزد سفیر کارلوس آراگون گل دے لا سرنا نال ملاقات اچ صدر سفارتی تعلقات دے 75 سال مکمل تھیوݨ دے سنگِ میل دا ذکر کیتا اتے کثیرالجہتی نظام کیتے سپین دے عزم کوں سراہیا ۔ انھاں جی ایس پی پلس دے تحت مضبوط تجارتی تعلقات کوں اجاگر کریندیں ہوئیں مزید سرمایہ کاری تے تعاون دی حوصلہ افزائی کیتی اتے محفوظ تے قانونی ہجرت دے نال نال ثقافتی و تعلیمی تبادلیاں دی اہمیت تے زور ݙتا۔ انھاں خلیجی بحران دے حوالے نال سپین دے اصولی موقف کوں سراہیا اتے آکھیا جو اے مکالمے، کشیدگی اچ ڳھٹکی اتے بین الاقوامی قانون دی پاسداری دے عزم دی عکاسی کریندے ۔ تنزانیہ دے نامزد سفیر لیفٹیننٹ جنرل (ر) یعقوب حسن محمد نال گفتگو اچ صدر تنزانیہ تے مشرقی افریقی برادری دے نال تعلقات کوں مضبوط بݨاوݨ دے عزم دا اعادہ کیتا ۔ انھاں تجارت، سرمایہ کاری تے تکنیکی تعاون اچ اضافے دی لوڑھ تے زور ݙتا اتے مضبوط کاروباری رابطے، بہتر رابطہ کاری تے عوامی سطح تے تبادلیاں کوں فروغ ݙیوݨ دی ضرورت کوں اجاگر کیتا۔ سنگاپور دے نامزد ہائی کمشنر اسحاق بن اسماعیل نال ملاقات اچ صدر سنگاپور کوں ہک اہم علاقائی شراکت دار قرار ݙیندیں ہوئیں تجارت، فن ٹیک، انفراسٹرکچر تے خدمات دے شعبیاں اچ تعاون ودھاوݨ دے امکانات کوں اجاگر کیتا ۔ انھاں پاکستانی کمیونٹی دے کردار، بہتر رابطہ کاری تے موسمیاتی و ڈیجیٹل معیشت دے اقدامات اچ اشتراک دی اہمیت تے وی زور ݙتا ۔ آوݨ تے سفیراں کوں گارڈ آف آنر پیش کیتا ڳیا ۔ قومی ترانے وجائے ڳئے اتے سفیراں سفارتی اسناد پیش کرݨ توں پہلے پریڈ دا معائنہ کیتا۔