آپریشن غضبُ اللِّحق اچ پاکستانی سکیورٹی فورسز دے ہتھوں افغان طالبان رجیم کوں بدترین پسپائی دا سامنا

اسلام آباد۔ 8 اپریل (اے پی پی) آپریشن غضبُ اللِّحق اچ پاکستانی سکیورٹی فورسز دے ہتھوں افغان طالبان رجیم کوں بدترین پسپائی دا سامنا کرݨا پئے۔ پاکستانی سکیورٹی فورسز سرحد پار حملیاں دا بھرپور جواب ݙیندیں ہوئیں افغان طالبان دے ناپاک عزائم کوں خاک اچ ملا ݙتے ۔ افغان میڈیا وی پاکستان دے ہتھوں بزدل افغان طالبان رجیم دی شرمناک ہزیمت دی تصدیق کر ݙتی اے۔ افغان میڈیا ’افغانستان انٹرنیشنل‘ دے مطابق پاکستانی سکیورٹی فورسز دے نال اڄوکی جھڑپاں دے بعد افغان طالبان صوبے نورستان تے کنڑ اچ سرحدی چوکیاں چھوڑ تے فرار تھی ڳئن۔ افغان طالبان سرحدی چوکیاں توں پسپائی دے بعد مسیتاں اچ نہ صرف لُک ڳئے بلکہ عام شہریاں دے روپ اچ علاقیاں توں فرار وی تھی ڳئن۔ قبائلی عمائدین آکھیا جو افغان طالبان سکیورٹی دی فراہمی اچ مکمل طور تے ناکام تے اپݨی عبرتناک شکست لکاوݨ کیتے غلط معلومات کھنڈیندے پئن۔ افغان طالبان رجیم دی غفلت عوام کوں فاقہ کشی تے مجبور کیتا، مقامی آبادی مدد کیتے پاکستانی سکیورٹی فورسز نال رجوع کرݨ دا عندیہ ݙے ݙتے ۔ ماہرین دے مطابق طالبان رجیم دے خلاف اڄوکی کارروائیاں ایں ڳالھ دا ثبوت ہن جو پاکستانی سکیورٹی فورسز کہیں وی مہم جوئی دا منہ ٻھن جواب ݙیوݨ دی مکمل صلاحیت رکھیندن۔ پاکستان دہشت گرداں دے ٹکاݨیاں کوں نشانہ بݨا تے اے واضح سنیھا ݙتے جو ہݨ دہشت گرداں دی سرپرستی برداشت نہ کیتی ویسی۔