وزیراعظم شہباز شریف دا ایران تے امریکہ سودھے فریقین ولوں مشرقِ وسطیٰ تے خلیج اچ فوری جنگ بندی تے اتفاق دا خیرمقدم

اسلام آباد۔ 8 اپریل (اے پی پی) وزیراعظم محمد شہباز شریف ایران تے امریکہ سودھے فریقین ولوں مشرقِ وسطیٰ تے خلیج اچ فوری جنگ بندی تے اتفاق دا خیرمقدم کریندیں ہوئیں جمعہ کوں ݙوہیں ملکاں دے وفود کوں تنازعات دے حتمی تے جامع حل کیتے ٻئی ڳالھ مہاڑ کیتے اسلام آباد آوݨ دی دعوت ݙتی اے۔ بدھ دی سویر ’’ایکس‘‘ تے آپݨے تاریخ ساز سنیھے جیندے کیتے پوری دنیا انتظار کریندی پئی ہئی اچ وزیراعظم آکھیا جو انھاں کوں انتہائی عاجزی دے نال اے اعلان کریندیں ہوئیں خوشی تھیندی پئی اے جو ایران تے امریکہ آپݨے اتحادیاں نال رَل تے فوری جنگ بندی تے اتفاق کر گھدے جیڑھی لبنان سودھے ہر ڄاہ فوری طور تے نافذ العمل تھیسی۔ وزیراعظم آکھیا جو او ایں دانشمندانہ اقدام دا پرتپاک خیرمقدم کریندیں ہوئیں ݙوہیں ملکاں دی قیادت دا تہہ دل توں شکریہ ادا کریندن ۔ وزیراعظم ایران تے امریکہ دے وفود کوں 10 اپریل جمعہ دے ݙینہہ سارے تنازعات دے حتمی تے جامع حل کیتے ٻئی ڳالھ مہاڑ کیتے اسلام آباد آوݨ دی دعوت ݙیندیں ہوئیں آکھیا جو فریقین غیر معمولی بصیرت، دانش تے فہم و فراست دا مظاہرہ کیتے اتے امن و استحکام دے فروغ کیتے تعمیری انداز اچ مسلسل رابطے اچ رہین۔ وزیراعظم ایں توقع دا اظہار کیتا جو اسلام آباد مذاکرات دے ذریعے پائیدار امن دا حصول ممکن تھیسی ۔ انھاں آکھیا جو اساں آوݨ آلے ݙینہاں اچ دنیا کوں ٻئی خوشخبریاں سݨاوݨ چاہندوں۔این توں پہلے منگل دی رات کوں ’’ایکس‘‘ تے اپݨے سنیھے اچ وزیراعظم محمد شہباز شریف مشرقِ وسطیٰ اچ جنگ دے خاتمے تے امن کیتے سفارتی کوشِشاں دے بار آور تھیوݨ دی امید ظاہر کریندیں ہوئیں صدر ٹرمپ توں مہلت اچ ݙو ہفتیاں دی توسیع، ایران توں ݙو ہفتیاں کیتے آبنائے ہرمز کھولݨ اتے سارے متحارب فریقاں توں ݙو ہفتیاں دی جنگ بندی دی درخواست کیتی ہئی ۔ انھاں اپݨے سنیھے دے ذریعے دنیا کوں آگاہ کیتا ہئی جو مشرقِ وسطیٰ اچ جاری جنگ دے پرامن حل کیتے کیتی ڳئی سفارتی کوشِشاں بتدریج، مضبوط تے موثر انداز اچ اڳوں ودھدیاں پئن اتے انھاں دے جلدی ٹھوس نتائج تائیں پڄݨ دے امکانات موجود ہن۔ وزیراعظم سفارت کاری دی کامیابی کیتے امریکی صدر ٹرمپ توں درخواست کیتی ہئی جو او مہلت اچ ݙو ہفتیاں دی توسیع کرن ۔ انھاں ایران توں وی درخواست کیتی ہئی جو او خیرسگالی دے جذبے دے تحت آبنائے ہرمز کوں ݙو ہفتیاں کیتے کھول ݙیوے ۔ انھاں آکھیا ہئی جو اساں سارے متحارب فریقاں تے زور ݙیندوں جو او ہر ڄاہ ݙو ہفتیاں کیتے جنگ بندی کرن تاں جو سفارتی کوشِشاں کوں جنگ دے حتمی خاتمے تائیں پڄݨ دا موقع مل سڳے جیڑھا خطے اچ دیرپا امن تے استحکام دے مفاد اچ اے ۔ وزیراعظم دے ایں اعلان دے بعد مشرقِ وسطیٰ اچ جنگ ٹلݨ دا امکان پیدا تھیا ہئی اتے پوری دنیا دی نظراں ایں اعلان تے مرکوز ہن۔