وزیراعظم محمد شہباز شریف دا جنگ بندی تے پرامن سفارتی کوشِشاں دے ذریعے تنازعے دے حل اچ پیشرفت تے چین، سعودی عرب، ترکیہ، مصر تے قطر سمیت برادر ملکاں دا شکریہ

اسلام آباد۔ 8 اپریل (اے پی پی) وزیراعظم محمد شہباز شریف چین، سعودی عرب، ترکیہ، مصر تے قطر سودھے برادر ملکاں دا شکریہ ادا کیتے جنھاں جنگ بندی تے پرامن سفارتی کوشِشاں دے ذریعے تنازعے دے حتمی حل آلے پاسے ودھݨ دے سلسلے اچ بے مثال تے بھرپور تعاون کیتے۔ بدھ کوں سماجی رابطے دی ویب سائٹ ایکس (ٹویٹر) تے آپݨے سنیھے اچ وزیراعظم آکھیا جو ’’اسلام آباد مذاکرات‘‘ آلے پاسے پیشرفت کریندے ہوئیں میں برادر ملکاں عوامی جمہوریہ چین، مملکتِ سعودی عرب، جمہوریہ ترکیہ، عرب جمہوریہ مصر تے ریاستِ قطر دا دلوں اتے مخلصانہ شکریہ ادا کرݨ چاہنداں جو انھاں جنگ بندی اچ پرامن سفارتی کوشِشاں کوں ہک جامع تے حتمی حل آلے پاسے ودھݨ دا موقع ݙیوݨ کیتے بے مثال تے بھرپور تعاون فراہم کیتے۔ وزیراعظم آکھیا جو او خلیج تعاون کونسل دے برادر ملکاں دا وی شکریہ ادا کرݨ چاہندن جئیں دی مسلسل حمایت تے خطے اچ امن و استحکام کیتے وابستگی اساݙی کوشِشاں کیتے نہایت اہم تے بنیادی حیثیت رکھیندی اے۔ انھاں آکھیا جو اساݙے سارے برادر ملکاں تے ریاست ہائے متحدہ امریکہ دی قیادت امن کوں ہک موقع ݙیوݨ کیتے غیر معمولی دور اندیشی، حکمت تے صبر دا مظاہرہ کیتے ۔ انھاں آکھیا جو او پوری دنیا اچ آپݨے سارے شراکت داراں تے دوستاں دا وی شکریہ ادا کریندن جنھاں پاکستان دی عالمی امن کیتے مخلصانہ کوشِشاں کوں سرائے اتے انھاں دا اعتراف کیتے۔ انھاں آکھیا جو آؤ اساں سارے رَل تے خطے تے ایندے توں اڳوں ہک پائیدار تے دیرپا امن دے قیام کیتے کم کروں۔