چیئرمین سینیٹ سید یوسف رضا گیلانی دا ایران-امریکہ جنگ بندی دا خیرمقدم، پاکستان دی سفارتی قیادت کوں خراجِ تحسین پیش

اسلام آباد۔ 8 اپریل (اے پی پی) چیئرمین سینیٹ سید یوسف رضا گیلانی امریکہ تے ایران وچال جنگ بندی دے اعلان کوں خوش آئند قرار ݙیندیں ہوئیں اینکوں مشرقِ وسطیٰ سمیت خطے اچ امن، استحکام تے کشیدگی اچ ڳھٹکی آلے پاسے ہک اہم تے حوصلہ افزا پیشرفت قرار ݙتے ۔ ایوانِ بالا توں خطاب کریندیں ہوئیں چیئرمین سینیٹ آکھیا جو پاکستان ہمیشہ بین الاقوامی تنازعات دے حل کیتے مذاکرات، سفارتکاری تے پرامن روابط کوں ای پائیدار راستہ قرار ݙتے ۔ انھاں آکھیا جو اے جنگ بندی سفارتی کوشِشاں دی کامیابی دا واضح ثبوت اے اتے ذمہ دار عالمی قیادت دے ایں عزم دی عکاس اے جو ٻئی کشیدگی توں بچیا ونڄے۔چیئرمین سینیٹ پاکستان دی قیادت کوں خراجِ تحسین پیش کریندیں ہوئیں صدر آصف علی زرداری، وزیراعظم محمد شہباز شریف، نائب وزیراعظم تے وزیرِ خارجہ سینیٹر محمد اسحاق ڈار اتے چیف آف آرمی سٹاف تے چیف آف ڈیفنس فورسز فیلڈ مارشل سید عاصم منیر دے کردار کوں سراہیا جنھاں دی مربوط تے فعال سفارتی کوششاں امن دی جانب مثبت پیشرفت اچ اہم کردار ادا کیتے۔ انھاں امریکہ تے ایران ولوں مذاکرات تے آمادگی کوں وی سراہیا اتے آکھیا جو آپسی مکالمہ ای پائیدار امن، علاقائی استحکام تے دیرپا ہم آہنگی دی بنیاد اے۔ سید یوسف رضا گیلانی پاکستان دے سفارتی عملے دی پیشہ ورانہ مہارت، لگن تے انتھک محنت کوں سراہندیں ہوئیں آکھیا جو انھاں دی کوششاں کشیدگی اچ ڳھٹکی کیتے اہم ثابت تھین۔ انھاں خبردار کیتا جو ایں پیشرفت کوں برقرار رکھݨ کیتے مسلسل عزم، صبر تے سارے فریقین وچال تعاون ضروری اے۔ چیئرمین سینیٹ ایں امید دا اظہار کیتا جو اسلام آباد اچ تھیوݨ آلے آوݨ آلے مذاکرات دیرپا امن، معاشی استحکام اتے علاقائی تعاون دی بنیاد فراہم کریسن ۔ انھاں عالمی برادری تے زور ݙتا جو او امن دے قیام تے استحکام کیتے جاری سفارتی اقدامات دی بھرپور حمایت کرے۔ این توں پہلے اجلاس دے باقاعدہ آغاز توں پہلے چیئرمین سینیٹ رومانیہ دے نیشنل چیمبر کوائر ولوں پاکستان دے قومی ترانے دی خوبصورت کورل پیشکش دے بارے ݙسیا۔چیئرمین سینیٹ سید یوسف رضا گیلانی پارلیمنٹ ہاؤس اچ پاکستان تے رومانیہ وچال سفارتی تعلقات تے مبنی تصویری نمائش دا افتتاح وی کیتا جینکوں انھاں چھی ݙہاکیاں تے محیط دوستی، تعاون تے مشترکہ وژن دی عکاسی قرار ݙتے۔ افتتاحی تقریب توں خطاب کریندیں ہوئیں چیئرمین سینیٹ رومانیہ دے سفیر ڈین اسٹوینسکو تے سفارتخانے دی ایں کاوش کوں سراہیا اتے عوامی تے پارلیمانی رابطیاں دی اہمیت تے زور ݙتا۔تقریب اچ ڈپٹی چیئرمین سینیٹ سیدال خان، سفراء، اراکینِ پارلیمنٹ اتے معزز مزماناں شرکت کیتی جیندے اچ علی حیدر گیلانی، سینیٹر رانا محمود الحسن، ایم این اے شرمیلا فاروقی تے وزیرِ مملکت قانون تے انصاف بیرسٹر عقیل وی شامل ہن۔ ایں موقع تے پاکستان اچ رومانیہ دے سفیر ڈین اسٹوینسکو امریکہ تے ایران وچال جنگ بندی اچ پاکستان دی کوشِشاں دی تعریف کیتی۔