جنگ بندی کوں ہݨ مستقل ڳالھ مہاڑ، اعتماد سازی دے اقدامات تے پرامن حل دے واضح عزم نال مستحکم کیتا ونڃݨا چاہیدے، صدرِ مملکت آصف علی زرداری

اسلام آباد۔ 8 اپریل (اے پی پی) صدرِ مملکت آصف علی زرداری امریکہ تے ایران وچال بدھ دی سویر تھیوݨ آلی جنگ بندی دا خیرمقدم کریندیں ہوئیں اینکوں بروقت اقدام قرار ݙتے جیڑھا ڳالھ مہاڑ، تحمل تے خطے اچ مستحکم ماحول کیتے راستہ فراہم کریندے۔ ایوانِ صدر دے پریس ونگ دے مطابق صدرِ مملکت آکھیا جو پاکستان ہمیشہ خلوصِ نیت دے نال کشیدگی اچ ڳھٹکی کیتے نیک نیتی نال مسلسل کم کیتے، جݙاں دنیا ہک سنگین تباہی دے نیڑے ہئی اساں اے اقدام خطے تے پوری انسانیت دی بھلائی کیتے کیتے۔ صدرِ مملکت آکھیا جو امن سلامتی، اقتصادی استحکام تے باہم جڑے ہوئے خطیاں اچ لوکاں دی فلاح و بہبود کیتے ضروری اے۔ انھاں آکھیا جو پاکستان کوں دانشمندی، عزم تے امن کیتے ثابت قدمی دے نال قیادت کرݨ تے فخر اے۔ صدرِ مملکت ایران تے امریکہ دی قیادت دی تعریف کیتی جو انھاں تصادم دی بجائے ڳالھ مہاڑ کوں ترجیح ݙتی اے۔ انھاں واشنگٹن، تہران، اسلام آباد تے خلیجی ملکاں خصوصاً سعودی عرب دی قیادت دی انتھک کوشِشاں کوں سراہیا جیندے نال کشیدگی اچ ڳھٹکی تے سفارتکاری کیتے راستہ کھليے۔ صدرِ مملکت وزیراعظم محمد شہباز شریف، چیف آف آرمی سٹاف تے چیف آف ڈیفنس فورسز فیلڈ مارشل سید عاصم منیر اتے نائب وزیراعظم و وزیرِ خارجہ سینیٹر محمد اسحاق ڈار دی انتھک کوششاں دی تعریف کیتی۔ انھاں آکھیا جو انھاں رہنماواں دی بروقت کاوشاں، قیادت تے مسلسل سفارتی رابطیاں خطے اچ کشیدگی دے خاتمے تے امن دے فروغ کیتے پاکستان دی کوشِشاں کوں اڳوں ودھاوݨ اچ اہم کردار ادا کیتے۔ صدرِ مملکت ایں مفاہمت تئیں پڄݨ اچ شامل سارے فریقین ولوں حقیقت پسندی، لچک تے مدبرانہ طرزِ عمل دے مظاہرے کوں سراہیا۔ انھاں ایں ڳالھ دا اعادہ کیتا جو جنگ بندی کوں ہݨ مستقل ڳالھ مہاڑ، اعتماد سازی دے اقدامات تے پرامن حل دے واضح عزم نال مستحکم کیتا ونڃݨا چاہیدے۔