اسلام آباد۔ 9 اپریل (اے پی پی) صدرِ مملکت آصف علی زرداری اسرائیلی قابض افواج ولوں مسجدِ اقصیٰ (الحرم الشریف) تے دھاوا بولݨ دے اقدام دی شدید ترین الفاظ اچ مذمت کریندیں ہوئیں اینکوں بین الاقوامی قانون دی خلاف ورزی تے مقدس مقام دی حرمت تے تاریخی حیثیت تے حملہ قرار ݙتے۔ خمیس کوں ایوانِ صدر دے پریس ونگ توں جاری تھئیے بیان دے مطابق صدرِ مملکت 6 اپریل کوں …
صدرِ مملکت دی مسجدِ اقصیٰ تے دھاوا بولݨ دی مذمت، حیثیت اچ تبدیلی دی کوشِشاں دے خلاف انتباہ
اسلام آباد۔ 9 اپریل (اے پی پی) صدرِ مملکت آصف علی زرداری اسرائیلی قابض افواج ولوں مسجدِ اقصیٰ (الحرم الشریف) تے دھاوا بولݨ دے اقدام دی شدید ترین الفاظ اچ مذمت کریندیں ہوئیں اینکوں بین الاقوامی قانون دی خلاف ورزی تے مقدس مقام دی حرمت تے تاریخی حیثیت تے حملہ قرار ݙتے۔ خمیس کوں ایوانِ صدر دے پریس ونگ توں جاری تھئیے بیان دے مطابق صدرِ مملکت 6 اپریل کوں ہک اسرائیلی وزیر توں منسوب واقعے دا حوالہ ݙیندیں ہوئیں ایں اقدام کوں اشتعال انگیزی قرار ݙتے اتے مسجدِ اقصیٰ دی مسلمہ مذہبی تے قانونی حیثیت اچ کہیں وی قسم دی تبدیلی دی کوشِشاں کوں مسترد کیتے۔ انھاں مسجدِ اقصیٰ تائیں رسائی تے اڄوکی پابندیاں بالخصوص رمضان المبارک تے عید دے دوران لاتی ڳئی رکاوٹاں تے تشویش دا اظہار کریندیں ہوئیں آکھیا جو خطے دی صورتحال بشمول امریکہ تے ایران وچال جاری کشیدگی کوں انھاں اقدامات دے جواز دے طور تے استعمال کیتا ویندا پئے۔ صدرِ مملکت عالمی برادری توں مطالبہ کیتا جو او ایجھے اقدامات دی روک تھام کیتے فوری اقدامات کرے ۔ انھاں فلسطینی عوام دے نال پاکستان دی غیر متزلزل حمایت دا اعادہ کریندیں ہوئیں ہک آزاد فلسطینی ریاست دے قیام دی حمایت کیتی اے جئیں دا دارالحکومت القدس الشریف ہووے۔
