1973 دا آئین وفاقِ پاکستان تے قومی اتحاد دی درخشندہ علامت اے، وزیراعظم دا یومِ دستور دے موقع تے سنیھا

اسلام آباد۔ 10 اپریل (اے پی پی) وزیراعظم محمد شہباز شریف آکھیا جو 1973 دا آئین وفاقِ پاکستان تے قومی اتحاد دی درخشندہ علامت اے، ساری ریاستی اکائیاں قومی یگانگت تے مجموعی معاشی ترقی تے خوشحالی کیتے آپݨا آئینی کردار خوش اسلوبی نال سر انجام ݙیندی پئن، پاکستان اقوامِ عالم اچ آپݨا سر فخر توں بلند کیتے ترقی تے خوشحالی دا پندھ جاری رکھیسی۔ جمعہ کوں وزیراعظم آفس دے میڈیا ونگ توں یومِ دستور (10 اپریل) دے موقع تے جاری سنیھے اچ وزیراعظم آکھیا جو اڄ اساں آئینِ اسلامی جمہوریہ پاکستان دی منظوری دا ݙینہہ قومی جذبے نال منیندے پئیوں، اساں دستور دے معماراں کوں خصوصی خراجِ تحسین پیش کریندوں، آئین عوام تے ریاست وچال ہک مقدس معاہدے دا ناں اے۔ 10 اپریل 1973 کوں منظور کیتے ڳئے متفقہ آئینِ پاکستان ملک اچ پارلیمانی جمہوری نظامِ حکومت تے ریاستِ پاکستان دے مضبوط ادارہ جاتی ڈھانچے دی بنیاد رکھی اے۔ انھاں آکھیا جو 1973 دا آئینِ پاکستان سارے شہریاں دے بنیادی انسانی حقوق دا محافظ اے۔ اے آئینی دستاویز نہ صرف بنیادی انسانی حقوق کوں تفصیل نال بیان کریندی اے بلکہ انھاں دی فراہمی کیتے قانونی لائحہ عمل کوں وی یقینی بݨیندی اے۔ انھاں آکھیا جو 1973 دا آئین وفاقِ پاکستان تے قومی اتحاد دی درخشندہ علامت اے، وفاقِ پاکستان دی ساری ریاستی اکائیاں قومی یگانگت تے مجموعی معاشی ترقی تے خوشحالی کیتے آپݨا آئینی کردار خوش اسلوبی نال سر انجام ݙیندی پئن اتے تابندہ مستقبل کیتے کم کرݨ کیتے پرعزم ہن، ایہو قابلِ رشک اتفاق ملکِ خداداد تے اللہ بزرگ تے برتر دے فضل و کرم دا عکاس اے۔ انھاں آکھیا جو اللہ تعالیٰ پاکستان کوں جئیں عزت تے اکرام نال نوازیے اوندے کیتے اساں اوندی بارگاہ اچ سربسجود ہیسے، پاکستان اقوامِ عالم اچ آپݨا سر فخر توں بلند کیتے اتے آپݨی ترقی تے خوشحالی دا پندھ ان شاء اللہ جاری رکھیسی۔