سرکاری شعبے دے سالانہ ترقیاتی پروگرام اچ وفاقی وزارتِ تعلیم و پیشہ ورانہ تربیت کیتے 36 ارب 31 کروڑ روپے رکھئن

اسلام آباد۔ 12 جون (اے پی پی) وفاقی حکومت مالی سال 2026-27 دے وفاقی ترقیاتی پروگرام (پی ایس ڈی پی) اچ وفاقی تعلیم تے پیشہ ورانہ تربیت دے منصوبیں کیتے مجموعی طور تے 36 ارب 31 کروڑ 20 لکھ روپے دی خطیر رقم مختص کرݨ دی منظوری ݙے ݙتی اے۔ جاری ترقیاتی اسکیماں دے نال نال وزیرِاعظم یوتھ اسکل ڈیولپمنٹ پروگرامز کوں خصوصی اہمیت ݙتی ڳئی اے تاں جو ملک دے نوجواناں کوں جدید تعلیم تے ہنر نال آراستہ کیتا ونڄ سڳے۔دستیاب سرکاری دستاویزات موجب وفاقی وزارتِ تعلیم دے تحت جاری 28 اہم ترقیاتی منصوبیں کیتے مجموعی طور تے 25 ارب 41 کروڑ 14 لکھ 90 ہزار روپے مختص کیتے ڳئن۔ انھاں منصوبیں دی مجموعی لاگت دا تخمینہ 98 ارب 68 کروڑ 42 لکھ روپے توں ودھ اے۔ انھاں جاری سکیماں اچ اسلام آباد (آئی سی ٹی)، گلگت بلتستان (سکردو، استور، گانچھے)، آزاد جموں و کشمیر (نیلم، بھمبر، حویلی کہوٹہ، باغ)، بلوچستان (سبی، موسیٰ خیل، ژوب، قلعہ سیف اللہ، ڈیرہ بگٹی)، سندھ (ٹنڈو محمد خان) تے خیبر پختونخوا (چترال) اچ دانش سکولاں دا قیام تے نیٹ ورک دی توسیع شامل اے۔ملک دے پسماندہ علاقیں بشمول آزاد کشمیر، گلگت بلتستان، بلوچستان، خیبر پختونخوا تے سندھ اچ دانش سکولاں دے مشترکہ منصوبے (سکیم نمبر 138) کیتے مالی سال 2026-27 دے بجٹ اچ ریکارڈ 6 ارب 60 کروڑ 39 لکھ روپے مختص کیتے ڳئن جیں دی مجموعی لاگت 26 ارب 81 کروڑ روپے اے۔ دستاویزات موجب اسلام آباد دے سیکٹر H-8/4 اچ آٹزم دا شکار ٻالاں کیتے سینٹر آف ایکسی لینس دے قیام کیتے وی ہک ارب 24 کروڑ 94 لکھ روپے مختص کیتے ڳئن، جیں نال دارالحکومت تے گردونواح دے خصوصی ٻالاں کوں جدید ترین تعلیمی و تربیتی سہولتاں ملسن۔ ایں دے علاوہ اسلام آباد اچ سکولاں توں ٻاہر ٻالاں دے سکولاں اچ داخلے، روک تھام تے تعلیمی ترقی دے ترمیمی منصوبے کیتے 21 کروڑ 65 لکھ روپے رکھے ڳئن۔ نوجواناں کوں بااختیار بݨاوݨ کیتے وزیرِاعظم یوتھ پروگرام دے تحت 3 وݙے منصوبیں کیتے مجموعی طور تے 10 ارب 90 کروڑ 5 لکھ ہک ہزار ݙاہ روپے دی باری رقم مختص کیتی ڳئی اے۔ انھاں منصوبیں دی کل لاڳت 42 ارب 22 کروڑ روپے اے۔ ایں پروگرام دے تحت وزیرِاعظم یوتھ اسکل ڈویلپمنٹ پروگرام (ترمیم شدہ) کیتے 5 ارب 29 کروڑ روپے تے نیوٹیک دے تحت اسکل ڈویلپمنٹ پروگرام کیتے 2 ارب 61 کروڑ روپے مختص کیتے ڳئن جڈانجو وزیرِاعظم پاکستان فنڈ تعلیم (ترمیم شدہ) کیتے 3 ارب روپے رکھے ڳئن۔