سکیورٹی فورسز خاران تے مستونگ اچ انسدادِ دہشت گردی دیاں ݙو انڄ کارروائیاں اچ 8 دہشت گرد جہنم واصل کرݙتن، آئی ایس پی آر

راولپنڈی۔27 جون (اے پی پی) سکیورٹی فورسز بلوچستان دے اضلاع خاران تے مستونگ اچ 25 تے 26 جون کوں انسدادِ دہشت گردی دیاں ݙو کارروائیاں اچ 8 دہشت گرداں کوں جہنم واصل کرݙتے، اِنھاں کارروائیاں دا مقصد بھارتی پراکسیاں، فتنہ الہندوستان دا خاتمہ ہئی۔پاک فوج دے شعبہ تعلقاتِ عامہ آئی ایس پی آر توں جاری پریس ریلیز موجب 25 جون کوں سکیورٹی فورسز بلوچستان دے ضلع خاران اچ انٹیلی جنس دی بنیاد تے دہشت گرداں دے ہک گروپ دی نقل و حرکت کوں پکڑیا تے پیشہ ورانہ و ہنرمندی دے تحت کیتی ڳئی کارروائی دے نتیجے اچ بھارتی پراکسی فتنہ الہندوستان نال تعلق رکھݨ آلے ترائے دہشت گرداں کوں جہنم واصل کر ݙتا ڄݙاں جو ٻہوں سارے زخمی تھئے۔ایویں 26 جون کوں بلوچستان دے ضلع مستونگ اچ خودکش بمبار دی ممکنہ موجودگی دے خلاف ہک پیشگی انٹیلی جنس تے مبنی آپریشن کیتا ڳیا۔ پاک فوج دے جواناں آپریشن دے دوران دہشت گرداں دے ٹھکاݨے کوں موثر طریقے نال نشانہ بݨایا تے شدید فائرنگ دے تبادلے دے بعد ہک خودکش بمبار سودھے پنج دہشت گرداں کوں جہنم واصل کر ݙتا۔ آئی ایس پی آر موجب اِنھاں دہشت گرداں دے زیرِ استعمال اسلحہ، گولا بارود، دیسی ساختہ بم (آئی ای ڈیز) تے موٹر سائیکل وی برآمد کیتیاں ڳئن۔علاقے اچ موجود کہیں وی ݙوجھے بھارتی سپانسر شدہ دہشت گرد کوں مکاوݨ کیتے تلاشی دیاں کارروائیاں کیتیاں ویندیان پئن۔ پاکستان دی سکیورٹی فورسز تے قانون نافذ کرݨ آلے اداریں دی طرفوں وژن ’’عزمِ استحکام‘‘جیں دی نیشنل ایکشن پلان تے وفاقی سپریم کمیٹی منظوری ݙتی اے دے تحت انسدادِ دہشت گردی دی انتھک مہم ملک توں غیر ملکی سپانسرڈ دہشت گردی دے خاتمے کیتے بھرپور طریقے نال جاری رہسی۔