توانائی دے شعبے دی بہتری کیتے ودھ اقدامات اتے اصلاحات دی لوڑھ اے، وزیراعظم شہباز شریف

اسلام آباد۔30جولائی(اے پی پی)وزیراعظم محمد شہباز شریف توانائی دے شعبے اچ بہتری سانڳے اصلاحات اتے ودھ اقدامات تے زور ݙیندے آکھیے جو پورے ملک اچ سمارٹ میٹرز لاوݨے ہوسن، دیہی علاقیاں اچ لوڈشیڈنگ تے قابو پاوݨ کیتے شمسی توانائی دے منصوبے شروع کیتے ونڄن۔ او اسلام آباد اچ پاور ڈویژن دے امور بارے جائزہ اجلاس دی اڳواݨی کریندے پئے ہن۔ اجلاس اچ وفاقی وزیرِ قانون و انصاف اعظم نذیر تارڑ، وفاقی وزیرِ اقتصادی امور احد خان چیمہ، وفاقی وزیرِ پاور ڈویژن سردار اویس لغاری، وفاقی وزیرِ انفارمیشن ٹیکنالوجی و ٹیلی کام شزا فاطمہ، وزیرِ مملکت برائے خزانہ و ریلوے بلال اظہر کیانی، چارے صوبیاں دے چیف سیکرٹریز اتے آئی جیز پولیس و متعلقہ اعلیٰ سرکاری افسراں شرکت کیتی۔ وزیراعظم آکھیا جو پاور سیکٹر اچ اصلاحات ترجیح اے، ایں شعبے دی بہتری کیتے ودھ محنت دی ؛وڑھ اے، ملک اچ سمارٹ میٹرز لاوݨے ضروری ہین، بجلی چوری مکاوݨ، بجلی دیاں تقسیم کار کمپنیاں دے بلنگ سسٹم دا ٹیکنیکل آڈٹ کراوݨ اتے بجلی تقسیم کار کمپنیاں دی کارکردگی پرکھݨ کیتے پرفارمنس انڈیکیٹرز ٻݨائے ونڄن۔ انھاں ٹائم لائن نال مربوط اہداف ݙیندے آکھیا جو بہترین کارکردگی آلیاں ڈسکوز کوں اعزازات ݙتے ویسن۔ وزیراعظم دیہی علاقیاں اچ لوڈشیڈنگ تے قابو پاوݨ کیتے وستیاں دی سطح تے شمسی توانائی (سولرائزیشن) منصوبے ٻݨاوݨ دی ہدایت کیتی۔ اجلاس کوں بجلی تقسیم کار کمپنیاں دی کارکردگی تے بریفنگ ݙتی ڳئی۔ بریفنگ دے مطابق ٹرانسفارمر دی سطح تے ایسیٹ پرفارمنس منیجمنٹ سسٹم لاوݨ کیتے پہلا مرحلہ 30 ستمبر 2026ء تک مکمل تھیسی، اے پی ایم ایس نال مربوط ٹرانسفارمر لاوݨ نال بجلی چوری اتے لوڈشیڈنگ گھٹ کرݨ اچ مدد ملسی۔ اجلاس اچ ݙسایا ڳیا جو ملتان، لاہور، پشاور، ہزارہ اتے کوئٹہ دے ریجنز اچ 16.2 ملین سنگل فیز اے ایم آئی میٹرز دی تنصیب دا منصوبہ زیرِ غور اے۔