اسپین کاریز، کوئلہ کان اچ دھماکے دے نتیجے اچ جاں بحق تھیوݨ آلیاں دی تعداد 34 تھی ڳئی

کوئٹہ۔31 جولائی (اے پی پی) کوئٹہ دے نواحی علاقے سورینج دے مقام اسپین کاریز اچ کوئلہ کان اچ زہریلی گیس بھر ونڄݨ پاروں اچانک دھماکے دے نتیجے اچ جاں بحق تھیوݨ آلے کان کناں دی تعداد 34 تھی ڳئی اے، جڈانجو کان اچ پھتے ٻئے مزدوراں دی تلاش تے انھاں کوں بحفاظت کڈھݨ کیتے ریسکیو آپریشن اڄاں جاری اے۔ پی ڈی ایم اے بلوچستان دی جانب توں جاری کردہ اعداد و شمار دے مطابق سورینج اچ پیش آوݨ آلے کوئلہ کان حادثے دے بعد امدادی کارروائیاں اچ ریسکیو ٹیماں ہݨ تئیں 34 کان کناں دیاں لاشاں کان توں نکال گھدن۔ حادثے دے بعد متاثرہ کان اچ مزید کان کناں دے پھتے ہووݨ دا خدشہ اے، جنھاں دی تلاش کیتے امدادی ٹیماں مسلسل کارروائیاں اچ مصروف ہن۔ حکام دے مطابق کوئلہ کان اچ زہریلی گیس بھر ونڄݨ پاروں دھماکہ تھیا جئیں دے نتیجے اچ کان دا ہک حصہ منہدم تھی ڳیا اتے متعدد کان کن ملبے تلے دب ڳئے۔ حادثے دی اطلاع ملدیں ای پی ڈی ایم اے، ریسکیو، محکمہ مائنز اینڈ منرلز تے ٻئے متعلقہ اداریاں دیاں ٹیماں موقع تے پڄ ڳئیاں اتے امدادی کارروائیاں دا آغاز کیتا۔ ریسکیو ٹیماں ولوں بھاری مشینری تے خصوصی آلات دی مدد نال کان دے اندر ملبہ ہٹاوݨ تے پھتے ہوئے کان کناں تئیں رسائی حاصل کرݨ دا سلسلہ جاری اے۔ امدادی اہلکار انتہائی مشکل تے خطرناک حالات اچ متاثرہ کان دے اندر کارروائیاں کریندے پئن تانجو باقی ماندہ کان کناں کوں جلد از جلد تلاش کر تے باہر کڈھیا ونڄ سڳے۔ حکام دا آکھݨ اے جو ریسکیو آپریشن کوں تمام متاثرہ کان کناں کوں کان توں کڈھݨ تئیں جاری رکھیا ویسی۔ امدادی کارروائیاں دے دوران کان دے اندر موجود زہریلی گیس تے ٻئے خطرات پاروں ریسکیو اہلکار انتہائی احتیاط دے نال کارروائیاں انجام ݙیندے پئن۔ وزیراعلیٰ بلوچستان سورینج کوئلہ کان حادثے دا نوٹس گھندیں ہوئیں محکمہ مائنز اینڈ منرلز توں واقعے دی رپورٹ منڳ گھدی اے۔ متعلقہ حکام کوں امدادی کارروائیاں اچ مزید تیزی گھن آوݨ تے متاثرہ کان کناں کوں ہر ممکن مدد فراہم کرݨ دی ہدایت وی کیتی ڳئی اے۔