وزیراعظم دا آذربائیجان دے نال برادرانہ تعلقات کوں ٻیا مضبوط بݨاوݨ دا عزم

اسلام آباد۔31جولائی (اے پی پی) وزیراعظم محمد شہباز شریف آذربائیجان دے نال برادرانہ تعلقات کوں ٻیا مضبوط بݨاوݨ دے پاکستان دے غیر متزلزل عزم دا اعادہ کیتے۔ وزیراعظم محمد شہباز شریف نال جمعہ کوں اتھاں پاکستان اچ جمہوریہ آذربائیجان دے سفیر خضر فرہادوف الوداعی ملاقات کیتی۔ وزیراعظم آفس دے میڈیا ونگ توں جاری بیان دے مطابق نائب وزیراعظم تے وزیرِ خارجہ سینیٹر محمد اسحاق ڈار تے سیکرٹری خارجہ آمنہ بلوچ وی ایں موقع تے موجود ہن۔ ملاقات دے دوران وزیراعظم آذربائیجان دے سفیر خضر فرہادوف دی سفارتی ذمہ واریاں دے دوران پاکستان تے آذربائیجان وچال گہرے برادرانہ تعلقات دے فروغ کیتے انھاں دی مخلصانہ کاوشاں کوں سراہیا۔ وزیراعظم سیاسی، تجارتی، اقتصادی، دفاعی، ثقافتی تے عوامی روابط سمیت مختلف شعبیاں اچ ݙو پاسہ تعاون دے فروغ بالخصوص ݙوہائیں ملکاں وچال براہِ راست پروازاں دے آغاز اچ انھاں دی خدمات کوں قابلِ تحسین قرار ݙتا۔ وزیراعظم آذربائیجان دے صدر الہام علیوف کیتے نیک خواہشات دا اظہار کریندیں ہوئیں گزشتہ اݙھائی سال دے دوران آذربائیجان دے آپݨے متعدد دوریاں تے جولائی 2024ء اچ صدر الہام علیوف دے دورہِ پاکستان دی خوشگوار یاداں کوں تازہ کیتا۔ انھاں آذربائیجان دے نال برادرانہ تعلقات کوں ٻیا مضبوط بݨاوݨ دے پاکستان دے غیر متزلزل عزم دا اعادہ کیتا۔ وزیراعظم سفیر خضر فرہادوف کیتے مستقبل دی ذمہ واریاں اچ نیک تمناواں تے کامیابی دی دعا وی کیتی۔ خضر فرہادوف آپݨی سفارتی ذمہ واریاں دے دوران حکومتِ پاکستان تے پاکستانی عوام ولوں ملݨ آلی گرمجوشی، مہمان نوازی تے بھرپور تعاون تے وزیراعظم دا شکریہ ادا کیتا۔ انھاں پاکستان اچ آپݨی تعیناتی کوں آپݨے سفارتی کیریئر دا ہک یادگار تے قابلِ فخر باب قرار ݙیندیں ہوئیں پاکستان دے نال سٹریٹجک شراکت داری کوں مزید گہرا کرݨ دے آذربائیجان دے عزم دا اعادہ کیتا۔ ایں موقع تے انھاں وزیراعظم کوں آپݨے خاندان دے پاکستان اچ قیام دے تجربات تے مبنی ہک کتاب وی پیش کیتی۔