صدرِمملکت آصف علی زرداری دا فتنہ الہندوستان تے فتنہ الخوارج دے 49 دہشت گرداں کوں مکاوݨ تے سکیورٹی فورسز کوں خراجِ تحسین

اسلام آباد۔21اگست (اے پی پی) صدرِمملکت آصف علی زرداری سکیورٹی فورسز تے پولیس دے سانجھے انٹیلی جنس بیسڈ کارروائیاں وچ فتنہ الہندوستان تے فتنہ الخوارج دے 49 دہشت گرداں کوں مکاوݨ تے سکیورٹی فورسز کوں خراجِ تحسین پیش کریندے آکھیے جو ٻاہرلی پشت پناہی وچ سرگرم دہشت گرد عناصر ملک دے امن و استحکام کوں ضیان پڄاوݨ وچ کݙاہیں کامیاب نہ تھیسن۔ ایوانِ صدر دے پریس ونگ توں جاری بیان موجب صدرِمملکت آکھیا جو دہشت گردی دے منڈھوں خاتمے تئیں کارروائیاں بھرپور انداز وچ جاری رہسن۔ صدر آصف علی زرداری آکھیا جو او ݙینھ پرے کائنی جݙاں بلوچستان تے خیبر پختونخوا دے لوک دہشت گردی توں مکمل نجات گھن تے امن، قومی ترقی تے خوشحالی حاصل کریسن۔