وفاقی وزیرِ داخلہ محسن نقوی تے ملائیشین ہم منصب دا مشترکہ ورکنگ گروپ، سکیورٹی تعاون تے اتفاق

اسلام آباد۔22اگست (اے پی پی) وفاقی وزیرِ داخلہ محسن نقوی نال ملائیشیا دے وزیرِ داخلہ سیف الدین نصرالدین بن اسماعیل ملاقات کیتی، ایں موقعے تے فریقین انسدادِ دہشت گردی، انسدادِ منشیات دیاں کوششاں، سائبر کرائم دی روک تھام تے امیگریشن مینجمنٹ اچ تعاون دے فروغ تے اتفاق کیتا۔ اجلاس اچ دونوں وزارتاں وچال مشترکہ ورکنگ گروپ قائم کرݨ تے دہشت گردی، منشیات دی اسمگلنگ تے انسانی اسمگلنگ نال نبڑݨ کیتے انٹیلی جنس شیئرنگ دے طریقہ کار کوں مضبوط بݨاوݨ دا فیصلہ کیتا ڳیا۔ وزارتِ داخلہ دے مطابق ملائیشیا دے وزیرِ داخلہ دے وزارتِ داخلہ پجݨ تے وزیرِ داخلہ محسن نقوی خیر مقدم کیتا اتے انہاں نال ون آن ون ملاقات کیتی۔ ایں دے بعد وفود دی سطح تے ڳالھ مہاڑ تھئی جئیں اچ ݙوہیں ملکاں دے سینئر حکام شرکت کیتی۔ اجلاس دے دوران ݙوہیں فریقاں ݙوپاسہ تعلقات دا جائزہ گھدا اتے داخلی سلامتی تے قانون دے نفاذ نال متعلق شعبیاں اچ تعاون ودھاوݨ تے وی اتفاق کیتا۔ انہاں انسدادِ دہشت گردی دے اقدامات، انسدادِ منشیات دی کارروائیاں، غیر قانونی امیگریشن کوں روکݨ تے سائبر کرائم نال نبڑݨ بارے ڳالھ کیتی۔ ملاقات اچ سیاحت تے ویزا دی سہولت دا وی احاطہ کیتا ڳیا۔ اجلاس اچ وزیرِ مملکت برائے داخلہ طلال چوہدری، وفاقی سیکرٹری داخلہ، ڈائریکٹر جنرل ایف آئی اے، انسپکٹر جنرل فیڈرل کانسٹیبلری، نیشنل کوآرڈینیٹر نیکٹا، ڈائریکٹر جنرل پاسپورٹ، چیف کمشنر تے انسپکٹر جنرل اسلام آباد سمیت ٻئے اعلیٰ حکام وی شرکت کیتی۔