وزیراعظم محمد شہباز شریف دا پمز اچ سی ٹی کورونری اینجیوگرافی سہولت فعال نہ تھیوݨ تے نوٹس، انکوائری کمیٹی قائم

لاہور۔22اگست (اے پی پی) وزیراعظم محمد شہباز شریف اسلام آباد دے پمز ہسپتال اچ سی ٹی کورونری اینجیوگرافی دی سہولت فعال نہ تھیوݨ دا نوٹس گھندیں ہوئیں انکوائری کمیٹی قائم کر ݙتی اے۔ ہفتے کوں وزیرِ اعظم آفس دے میڈیا ونگ توں جاری بیان دے مطابق وزیراعظم محمد شہباز شریف پاکستان انسٹی ٹیوٹ آف میڈیکل سائنسز (پمز) وچ سی ٹی کورونری اینجیوگرافی دی سہولت دے عدم فعال یا عدم دستیاب تھیوݨ دے معاملے دا نوٹس گھندیں ہوئیں حقائق دا تعین کرݨ کیتے انکوائری کمیٹی قائم کر ݙتی اے اتے ہدایت کیتی اے جو او معاملے دے سارے پہلوواں دا جائزہ گھن تے حقائق تے ذمہ داری دا تعین تے آپݨی رپورٹ وزیراعظم کوں پیش کرے۔ کمیٹی دے چیئرمین، سیکرٹری اسٹیبلشمنٹ ڈویژن ہوسن، جݙاں جو ٻئے ممبران اچ سیکرٹری نیشنل ہیلتھ سروسز، ریگولیشنز اینڈ کوآرڈینیشن ڈویژن، اے ایف آئی سی توں بریگیڈیئر ڈاکٹر جہانزیب علی، ڈاکٹر نصرت اللہ چوہدری، پروفیسر ڈاکٹر ندیم حیات ملک، بریگیڈیئر (ر) ڈاکٹر عظمت حیات (پمز) تے مسٹر عمر فاروق (سی ٹی اینجیو ٹیکنیشن، اے ایف آئی سی) شامل ہوسن۔ کمیٹی لوڑھ دے مطابق کہیں ٻئے رکن کوں وی شامل کر سڳسی اتے ایں ڳالھ دا جائزہ گھنسی جو پمز اچ 2022ء توں سی ٹی کورونری اینجیوگرام کرݨ دی تکنیکی صلاحیت موجود ہئی اتے اگر ہئی تاں ایں کیتے مطلوبہ تکنیکی سہولیات، انسانی وسائل تے سافٹ ویئر وغیرہ کیڑھی حد تئیں دستیاب ہن۔ کمیٹی 2022ء توں ہݨ تک پمز وچ کیتے ڳئے سی ٹی کورونری اینجیوگرام دے طریقہ کار، انہاں دی تعداد، تاریخاں تے طریقہ کار دی نوعیت دا وی جائزہ گھنسی جݙاں جو متعلقہ ہسپتال دے ریکارڈ سمیت تمام متعلقہ دستاویزی ثبوتاں دا جائزہ گھدا ویسی۔ کمیٹی کارڈیالوجی تے ریڈیالوجی شعبیاں وچال سی ٹی کورونری اینجیوگرافی کیتے کہیں باقاعدہ ریفرل میکنزم، آپسی رابطے تے انتظامیہ دے کردار دا وی جائزہ گھنسی۔ وزیراعظم ہدایت کیتی اے جو کمیٹی تمام متعلقہ حقائق تے ریکارڈ دی مکمل جانچ پڑتال دے بعد آپݨی رپورٹ پیش کرے تانجو معاملے اچ ٻئی کارروائی قانون تے قواعد دے مطابق کیتی ونڄے۔ نیشنل ہیلتھ سروسز، ریگولیشنز اینڈ کوآرڈینیشن ڈویژن کمیٹی کوں انکوائری دے دوران معاونت فراہم کریسی۔