وزیراعظم دی بارشاں تے چھل توں متاثرہ خانداناں دی مالی معاونت، بجلی تے سڑکاں دی بحالی دی ہدایت

لاہور۔22اگست (اے پی پی) وزیراعظم محمد شہباز شریف اڄوکی بارشاں تے چھل توں متاثرہ خانداناں دی مالی معاونت تے متاثرہ علاقیاں اچ بجلی دی ترسیل تے رستے تکھے توں تکھے مکمل بحال کرݨ دی ہدایت کیتی اے۔ وزیراعظم محمد شہباز شریف دی صدارت ملک اچ اڄوکے مون سون بارشاں تے انہاں توں تھیوݨ آلے نقصاناں دے حوالے نال اجلاس تھیا۔ ہفتے کوں وزیرِ اعظم آفس دے میڈیا ونگ توں جاری بیان دے مطابق وزیراعظم اڄوکی بارشاں تے چھل توں متاثرہ خانداناں دی مالی معاونت دی ہدایت کریندیں ہوئیں آکھیا جو چھل اچ فوت تھیوݨ آلے تمام افراد دے خانداناں دی مالی معاونت کیتی ونڄے، مکمل تے جزوی طور تے تباہ تھئے مکاناں دے مالکاں دی وی مالی معاونت کیتی ونڄے۔انہاں چھل توں متاثرہ علاقیاں اچ بجلی دی ترسیل دے نظام تے سڑکاں دی بحالی تکھے توں تکھے مکمل کرݨ دی وی ہدایت کیتی۔ وزیراعظم آندی بارشاں تے چھل کوں ݙیکھدیں ہوئیں این ڈی ایم اے تے صوبائی ڈزاسٹر مینجمنٹ اتھارٹیاں کوں امدادی کارروائیاں کیتے مکمل طور تے تیار رہوݨ دی ہدایت کیتی۔ اجلاس اچ وزیراعظم کوں مون سون 2026ء دے اثرات تے صوبیاں تے این ڈی ایم اے ولوں امدادی کارروائیاں وچ پیشرفت دے حوالے نال بریفنگ ݙتی ڳئی جئیں اچ ݙسیا ڳیا جو ملک دے تمام متاثرہ علاقیاں اچ چھل متاثرین دی محفوظ جہیں تے ویلے سر منتقلی کیتی ڳئی اے، وزیرِ اعظم کوں بتایا ڳیا جو پورے ملک اچ مون سون بارشاں توں متاثرہ علاقیاں اچ ہݨ تئیں مجموعی طور تے 615 ٹن امدادی سامان بھیجیا ڳئے اتے ٻیا امدادی سامان بھیجݨ دے حوالے نال اقدامات کیتے ویندے پئن۔ بریفنگ دے مطابق پنجاب، سندھ، بلوچستان، خیبر پختونخوا، گلگت بلتستان تے آزاد جموں و کشمیر اچ بارشاں تے چھل توں متاثرہ علاقیاں اچ انفراسٹرکچر دی بحالی دا کم تیزی نال جاری اے۔ وزیرِ اعظم کوں ݙسیا ڳیا جو شمالی علاقیاں اچ ارلی وارننگ سسٹم فعال ہن جئیں پاروں چھل توں پہلے کئی شہریاں کوں محفوظ ڄہیں تے منتقل کیتا ڳیا۔اجلاس اچ وفاقی وزراء احسن اقبال، احد خان چیمہ، شزا فاطمہ خواجہ، معین وٹو، ڈاکٹر مصدق مسعود ملک، سردار اویس لغاری، چاریں صوبیاں، گلگت بلتستان تے آزاد جموں تے کشمیر دے چیف سیکریٹریز، چیئرمین این ڈی ایم اے لیفٹیننٹ جنرل انعام حیدر ملک اتے متعلقہ اداریاں دے اعلیٰ افسران شریک ہن۔