وزیرِ خزانہ دی زیرِ صدارت جینیاتی طور تے تبدیل شدہ مکئی دی کمیٹی دا اہم اجلاس

اسلام آباد۔31اگست (اے پی پی) حکومت جینیاتی طور تے تبدیل شدہ مکئی دی تجارتی بنیاداں تے کاشت کیتے پالیسی کوں حتمی شکل ݙیوݨ دا عمل تکھا کر ݙتے، نویں فریم ورک دے تحت مارکیٹ اچ روایتی بجاں دی سستی فراہمی کوں یقینی بݨیندے مرحلہ وار جی ایم ٹیکنالوجی دی طرف منتقلی کیتی ویسی تاں جو کساناں تے ملکی معیشت ݙوہائیں کوں ھکو سواں فیدہ پڄ سڳے۔ وزارتِ خزانہ دی طرفوں جاری بیان موجب ایں ضمن اچ وفاقی وزیرِ خزانہ و محصولات سینیٹر محمد اورنگزیب دی زیرِ صدارت جینیاتی طور تے تبدیل شدہ (جی ایم) مکئی دی کمیٹی دا ہک اہم اجلاس تھیا۔ اے کمیٹی وزیرِاعظم دی ہدایت تے پاکستان اچ جینیاتی طور تے تبدیل شدہ مکئی دی تجارتی بنیاداں تے منظوری دی پالیسی دا غیر جانبدارانہ، سائنسی تے شواہد تے مبنی جائزہ گھنݨ کیتے تشکیل ݙتی ڳئی اے۔ اجلاس اچ سارے متعلقہ فریقین دے نال کیتی ونڄݨ آلی مشاورت اچ ہݨ تئیں دی پیشرفت دا جائزہ ڳھدا ڳیا تے جی ایم مکئی دی تجارتی منظوری کیتے مجوزہ عملی تے عبوری فریم ورک تے ڳالھ مہاڑ کیتی ڳئی ۔ کمیٹی ہک ایجھے واضح تے قابلِ عمل فریم ورک تے زور ݙتا جو قومی مفاد کوں مقدم رکھیندے سارے فریقین دے تحفظات کوں دور کرسڳے۔ اجلاس دے دوران منظور شدہ نیشنل ایگریکلچرل بائیو ٹیکنالوجی پالیسی دے تحت جی ایم تے روایتی مکئی دے سانجھی بقاء دے اصول تے تفصیلی ڳالھ کیتی ڳئی تے ایجھے اقدامات تے غور کیتا ڳیا جنھاں نال ݙوہائیں شعبے کٹھے کم جاری رکھ سڳن۔ فریقین منتقلی دی مدت، مارکیٹ اچ غیر جی ایم بجاں دی دستیابی تے قیمتاں اچ بلاوجہ ودھارے دے بغیر سپلائی دا سلسلہ برقرار رکھݨ دی حکمتِ عملی تے وی غور کیتا، کمیٹی صنعت نال وابستہ نمائندیں دی طرفوں چاتے ڳئے تحفظات، بالخصوص عبوری دورانیے، روایتی بجاں دی دستیابی تے موجودہ صنعت تے ایں دے ممکنہ اثرات دا جائزہ ڳھدا۔ ایں موقع تے واضح کیتا ڳیا جو جی ایم مکئی دی طرف منتقلی دا عمل بتدریج ہوسی تاں جومتعلقہ فریقین کوں نویں نظام اچ ڈھالݨ دا پورا موقع مل سڳے۔ نال ہی مارکیٹ اچ غیر جی ایم بیج دی مسلسل فراہمی دی اہمیت تے وی زور ݙتا ڳیا، شرکاء ہک ایجھے جامع تے فول پروف فریم ورک دی لوڑھ تے زور ݙتا جیندے اچ واضح رہنما خطوط موجود ہوون تاں جو جی ایم تے غیر جی ایم مکئی دی کاشت دا نظام کامیابی نال کٹھے چل سڳے۔ کمیٹی اے وی آکھیا جو ایں عمل اچ بج دی صنعت، مکئی دی ملان دے مالکان، تعلیمی اداریں تے تکنیکی ماہرین سودھے سارے شراکت داراں دی صلاح تے سفارشات کوں لازمی شامل کیتا ونڄے۔ وزیرِ خزانہ آکھیا جو ایں مشق دا مقصد صرف پالیسی بݨاوݨ نی بلکہ ایں تے موثر عملدرآمد تے منتقلی کوں یقینی بݨاوݨ اے۔ کمیٹی ملک دے زرعی شعبے دی ترقی تے پیداواری صلاحیت کوں ودھاوݨ کیتے جدید ٹیکنالوجی اپناوݨ، کٹائی دے جدید طریقیں، سٹوریج تے متعلقہ بنیادی ڈھانچے اچ بہتری گھن آوݨ دی اہمیت تے وی ڳاولھ کیتی ۔ وزیرِ خزانہ سارے ارکان تے شراکت داراں دیاں کوششاں دی تعریف کیتی تے آکھیا جو کمیٹی مختلف صلاح توں ودھ تے ہݨ اڳوں ودھݨ کیتے ہک وسیع تر اتفاقِ رائے حاصل کر ڳھدے۔اجلاس اچ سرکاری تے نجی ݙوہیں شعبیں دے نمائندیں شرکت کیتی جنھاں اچ سیکرٹری وزارتِ قومی غذائی تحفظ و تحقیق، زراعت تے غذائی تحفظ کیتے وزیرِاعظم دے کوآرڈینیٹر، سی ای او پاکستان گرین انیشیٹو، متعلقہ کاروباری تے برآمدی شعبیں دے نمائندے تے شعبہِ زراعت دے سائنسی و تکنیکی ماہرین شامل ہن