اسلام آباد۔ 03 ستمبر(اے پی پی)وزیرِ اعظم محمد شہباز شریف نیپال کیتے پاکستان دی مسلسل حمایت اتے یکجہتی دا عزم دوہریندے امید کیتی اے جو نیپال دے باہمت لوک سیلاب اتے لینڈ سلائیڈنگ نال تھیوݨ والے نقصاناں اتے سانحے توں ٻیا مضبوط تھی تے اٻُھرسن۔ وزیرِ اعظم اسلام آباد اچ نیپال دے سفارتخانے دا دورہ کیتے اتے نیپال اچ حالیہ تباہ کن سیلاب اتے لینڈ سلائیڈنگ نال مرݨ آلے لوکاں …
وزیرِ اعظم محمد شہباز شریف دا نیپال دے سفارتخانے دا دورہ، پاکستان ولوں مسلسل حمایت اتے یکجہتی دا اعادہ
اسلام آباد۔ 03 ستمبر(اے پی پی)وزیرِ اعظم محمد شہباز شریف نیپال کیتے پاکستان دی مسلسل حمایت اتے یکجہتی دا عزم دوہریندے امید کیتی اے جو نیپال دے باہمت لوک سیلاب اتے لینڈ سلائیڈنگ نال تھیوݨ والے نقصاناں اتے سانحے توں ٻیا مضبوط تھی تے اٻُھرسن۔ وزیرِ اعظم اسلام آباد اچ نیپال دے سفارتخانے دا دورہ کیتے اتے نیپال اچ حالیہ تباہ کن سیلاب اتے لینڈ سلائیڈنگ نال مرݨ آلے لوکاں دی یاد بارے تعزیتی کتاب اچ اپݨے تاثرات لکھین۔ وزیرِ اعظم دا نیپال دی سفیر ریٹا دھیتال سفارتخانے پڄݨ تے استقبال کیتا۔
وزیرِ اعظم نال وفاقی وزیرِ اطلاعات و نشریات عطاء اللہ تارڑ، معاونِ خصوصی سید طارق فاطمی، سیکرٹری خارجہ سفیر آمنہ بلوچ اتے ٻئے اعلیٰ حکام وی ہن۔ وزیرِ اعظم حکومتِ پاکستان اتے پاکستانی عوام ولوں حکومت اتے نیپال دے عوام خاص کر ایں سانحے اچ اپݨے پیاراں توں محروم تھیوݨ والے سوگوار خانداناں نال ہمدردی کریندے پرچاوݨی ݙتی۔ وزیرِ اعظم نیپال دے وزیرِ اعظم بالندر شاہ کوں فون کیتے اتے اپݨے جذبات ݙسیندے یقین ݙیوائے جو پاکستان ایں ݙکھ اچ نیپال نال مکمل یکجہتی کریندے، پاکستان ایں ہفتے نیپال کیتے ہنگامی امدادی سامان ٻھڄیسی اتے نیپال اچ جاری امداد و بحالی کارروائیاں اچ ہتھ ونݙایا ویسی۔
وزیرِ اعظم پاکستان اتے نیپال دے قریبی اتے دیرینہ برادرانہ تعلقات تے اعتماد کریندے آکھیے جو ݙوہیں ملک ہر ݙکھ سکھ اچ نال کھڑن۔ نیپال دی سفیر ریٹا دھیتال وزیرِ اعظم دا شکریہ ادا کریندے آکھیا جو پاکستانی قیادت دا اظہارِ یکجہتی نیپال دے لوک یاد رکھسن۔ انہاں وزیرِ اعظم کوں ݙوہائیں ملکاں دے ݙو طرفہ تعاون دی موجودہ صورتحال دا وی ݙسایا۔
