وفاقی وزیرِ خزانہ دی زیرِ صدارت اجلاس، پاسکو تے یوٹیلیٹی سٹورز دی بندش تے پیش رفت دا جائزہ

اسلام آباد۔ 07 ستمبر (اے پی پی) وفاقی وزیرِ خزانہ و محصولات سینیٹر محمد اورنگزیب یوٹیلیٹی سٹورز کارپوریشن متعلق زیرِ سماعت مقدمات دا نوٹس گھندے ہدایت کیتی جو کارپوریشن دی بندش دے عمل دے نال نال سارے قانونی، مالی تے انتظامی تقاضے وی پورے کیتے ونڄن۔ انہاں اے ڳالھ پاکستان ایگریکلچرل سٹوریج اینڈ سروسز کارپوریشن (پاسکو) تے یوٹیلیٹی سٹورز کارپوریشن (یو ایس سی) دی بندش دے عمل اچ پیش رفت تے ایں عمل دی تکمیل کیتے درکار باقی اقدامات دا جائزہ گھنݨ کیتے منعقدہ اجلاس اچ آکھی۔ وزارتِ خزانہ توں جاری بیان موجب اجلاس اچ یوٹیلیٹی سٹورز کارپوریشن دی بندش دے عمل اچ ہݨ تئیں تھئی پیش رفت دے بارے اچ تفصیلی بریفنگ ݙتی ڳئی۔ بریفنگ اچ منظور شدہ ملازمین دے سیورنس پیکیج تے عملدرآمد، تصدیق شدہ وینڈر واجبات دی ادائیگی، سٹاک دی واپسی تے تلفی ڄݙاں جو اثاثیں تے املاک دے انتظام متعلق اقدامات دا جائزہ ڳھدا ڳئے۔ اجلاس کوں ݙسایا ڳیا جو ملازمین کوں ادائیگیاں تے تصدیق شدہ واجبات دی ادائیگی دے معاملے اچ نمایاں پیش رفت تھی چکی اے تے ایں مقصد کیتے ضروری آڈٹ تے تصدیقی نظام وی وضع کیتے ڳئن۔ ملازمین تے ٻئے متعلقہ کلیمز دی درست سنڄاݨ تے تصدیق یقینی بݨاوݨ کیتے بائیومیٹرک تصدیق تے معاون دستاویزات سودھے مختلف اقدامات وی کیتے ڳئن۔ اجلاس کوں ݙسایا ڳیا جو وینڈرز دے واجبات دی ادائیگی اچ وی خاطر خواہ پیش رفت تھئی اے۔ تصدیق شدہ کلیمز دی جانچ پڑتال مکمل کرتے ادائگیاں کیتیاں ونڄ چکئن۔ اجلاس اچ یوٹیلیٹی سٹورز دی بندش دے بعد باقی ماندہ سٹاک دی صورتحال دا وی جائزہ ڳھدا ڳیا۔ اجلاس کوں ݙسایا ڳیا جو برانڈڈ تے ٻیاں کھاوݨ پیوݨ ڈیاں چیزاں دی وݙی مقدار واپس کیتی ونڄ چکی اے یا مقررہ طریقہ کار دے تحت تلف کر ݙتی ڳئی اے ڄݙاں جو باقی ماندہ سٹاک کوں وی ضابطے موجب نبیڑݨ دا عمل جاری اے۔ اجلاس اچ ریکس تے ٻئے منقولہ اثاثیں دی نیلامی دے حوالے نال پیش رفت دا وی جائزہ گھدا ڳیا۔ آئی ٹی آلات تے گاݙیاں دی صورتحال وی زیرِ غور آئی تے ݙسایا ڳیا جو انہاں دے تصرف یا منتقلی کیتے آڈٹ تے تصدیقی عمل جاری اے۔ اجلاس اچ یوٹیلیٹی سٹورز کارپوریشن دے اثاثیں دی نیلامی یا منتقلی کیتے مناسب انتظامات دی لوڑھ تے زور ݙتا ڳیا۔ وفاقی وزیرِ خزانہ یوٹیلیٹی سٹورز کارپوریشن متعلق زیرِ سماعت مقدمات دا وی نوٹس ڳھدا تے انہاں مقدمات کوں نبیڑݨ تے قانونی معاملیں کوں موثر انداز اچ ݙیکھݨ کیتے کیتیاں ونڄݨ آلیاں کوششاں دی تعریف کیتی انہاں ہدایت کیتی جو کارپوریشن دی بندش دے عمل دے نال نال سارے قانونی، مالی تے انتظامی تقاضے وی پورے کیتے ونڄن۔ اجلاس اچ پاسکو دی بندش دے عمل اچ تھئی پیش رفت دا وی جائزہ ڳھدا ڳیا جیندے اچ موجود سٹاک دی صورتحال تے باقی ماندہ امور دی تکمیل سانڳے کیتے ونڄݨ آلے انتظامات شامل ہن۔ اجلاس اچ مختلف صوبیں اچ موجود پاسکو دے سٹاک متعلق امور تے وی غور تھیا۔ اجلاس کوں ݙسایا ڳیا جو متعلقہ صوبیں دیاں ضرورتاں تے حالات کوں سامݨے رکھیندے ایں سٹاک دی منتقلی کیتے انتظامات کیتے ویندے پئن۔ وزیرِ خزانہ صوبائی حکام دے نال نیڑے رابطہ تے موثر تعاون دی لوڑھ تے زور ݙیندے آکھیا جو انہاں معاملیں دی وجہ توں ݙوہیں اداریں دی مجموعی بندش دا عمل تاخیر دا شکار نی ہووݨا چاہیدا۔ سینیٹر محمد اورنگزیب بندش دے عمل اچ پیش رفت دی رفتار برقرار رکھݨ تے باقی ماندہ کم کوں واضح ذمہ واریاں تے قابلِ عمل مدت دے تعین دے نال مربوط انداز اچ مکمل کرݨ دی لوڑھ تے زور ݙتا