سردار اویس احمد خان لغاری دا سی ٹی بی سی ایم دے تحت بجلی دے نظام تئیں براہ راست رسائی حاصل کرݨ آلے صارفین کیتے یوز آف سسٹم چارج دے تعین متعلق نیپرا دے فیصلے دا خیرمقدم

اسلام آباد۔ 07 ستمبر (اے پی پی) وفاقی وزیرِ توانائی سردار اویس احمد خان لغاری تے وزارتِ توانائی (پاور ڈویژن) مسابقتی مارکیٹ (سی ٹی بی سی ایم) دے تحت بجلی دے نظام تئیں براہ راست رسائی حاصل کرݨ آلے صارفین کیتے یوز آف سسٹم چارج دے تعین متعلق نیشنل الیکٹرک پاور ریگولیٹری اتھارٹی (نیپرا) دے فیصلے دا خیرمقدم کیتے۔ ترجمان پاور ڈویژن موجب وفاقی وزیر آکھیا جو یوز آف سسٹم چارج دا تعین پاکستان دے بجلی دے شعبے اچ اصلاحات تے جدید کاری دا ہک تاریخی سنگِ میل اے۔ اے سی ٹی بی سی ایم دے تحت براہ راست رسائی کوں عملی شکل ݙیوݨ کیتے درکار چھیکڑی اہم ریگولیٹری اقدام ہئی، جیندے نال پاکستان دے پہلے سی ٹی بی سی ایم نیلامی دے عمل کیتے آر ایف پی جاری کرݨ دا رستہ ہموار تھی ڳئے۔ انہاں آکھیا جو مسابقتی بجلی مارکیٹ دا قیام پاور سیکٹر اصلاحات دے وسیع تر ایجنڈے دا اہم حصہ اے جیندے تحت پاکستان کوں روایتی واحد خریدار تے مبنی مارکیٹ توں ہک مسابقتی تے صارف مرکز بجلی مارکیٹ دی طرف منتقل کرݨ کیتے ضروری ادارہ جاتی، ریگولیٹری، تکنیکی تے مارکیٹ متعلق تقاضے پورے کیتے ڳئن۔ ایں پیش رفت دے بعد اہل صنعتی صارفین پہلی واری اپݨی متعلقہ ڈسٹری بیوشن کمپنیاں توں بجلی گھنݨ تئیں محدود رہݨ دی بجائے مسابقتی مارکیٹ دے ذریعے اپݨی پسند دے بجلی ݙیوݨ آلیاں توں ݙو طرفہ بنیاداں تے بجلی گھن سڳسن۔ اویس لغاری آکھیا جو مسابقتی مارکیٹ دے فیدے صنعتی صارفین تئیں محدود نہ ہوسن بلکہ عام صارفین کوں وی فیدہ پڄاوݨ دی صلاحیت رکھیندن۔ بجلی دی خریداری اچ مسابقت زیادہ موثر پیداوار، موجودہ پاور پلانٹس دے بہتر استعمال، بہتر قیمت تے قابلِ اعتماد بجلی ݙیوݨ تے بجلی دی ویلیو چین اچ موجود نااہلیاں اچ کمی پاروں بݨ سڳدی اے۔ انہاں آکھیا جو مسابقتی مارکیٹ قابلِ تجدید توانائی، بیٹری انرجی سٹوریج تے ٻئے لچکدار توانائی وسائل دی شمولیت کوں وی ودھارا ݙیسی جیندے نال مقامی تے گھٹ لاڳت توانائی وسائل دے بہتر استعمال، نظام دی قابلِ اعتماد کارکردگی اچ بہتری تے مہانگے درآمدی ایندھن تے انحصار اچ کمی اچ مدد ملسی۔ وفاقی وزیر نیپرا دے کردار دی تعریف کریندے آکھیے جو یوز آف سسٹم چارج دا فیصلہ براہ راست رسائی کیتے ضروری ریگولیٹری فریم ورک ݙیندے تے وزارتِ توانائی، نیپرا تے ٻئے متعلقہ سٹیک ہولڈرز دیاں مربوط کوششاں دی عکاسی کریندے۔ انہاں آکھیا جو پہلے سی ٹی بی سی ایم نیلامی دے عمل دا آغاز محض ہک ریگولیٹری یا بجلی دی خریداری متعلق سنگِ میل نی بلکہ پاکستان دی بجلی مارکیٹ اچ ہک اہم ساختی تبدیلی دی نمائندگی کریسی تے ملک کوں زیادہ مسابقتی تے صارف مرکز پاور سیکٹر دی طرف گھن ویسی۔ وفاقی وزیرِ توانائی سردار اویس احمد خان لغاری آکھیا جو وزارتِ توانائی (پاور ڈویژن) باقی ماندہ تقاضیں دی تکمیل تے مسابقتی بجلی مارکیٹ کوں شفاف، موثر تے منظم انداز اچ عملی شکل ݙیوݨ کیتے پرعزم اے تاں جو اہل صارفین کوں بجلی دے انتخاب دے زیادہ موقع ملن تے بالآخر پاکستان دے سارے صارفین کیتے زیادہ موثر تے پائیدار بجلی نظام تشکیل ݙتا ونڄ سڳے۔