پاک بحریہ دے عزم، بہادری تے پیشہ ورانہ مہارت ہمیشہ قوم دا سر فخر نال بلند کیتے، صدر آصف علی زرداری دا یومِ بحریہ تے پیغام

اسلام آباد۔ 08 ستمبر (اے پی پی) صدرِ مملکت آصف علی زرداری آکھیے جو 8 ستمبر کوں اساں ہک باوقار تے سربلند قوم دی حیثیت نال یومِ بحریہ منیندا پیوں، میں پاک بحریہ دے سارے افسراں، سیلرز تے سویلین اہلکاراں کوں خراجِ تحسین پیش کرینداں جنہاں دے عزم، بہادری تے پیشہ ورانہ مہارت ہمیشہ قوم دا سر فخر نال اُچا کیتے۔ یومِ بحریہ تے ایوانِ صدر دے پریس ونگ توں جاری اپݨے پیغام اچ صدرِ مملکت آکھیا جو 7 تے 8 ستمبر 1965ء دی وچلی رات بھاری حفاظتی حصار اچ موجود بھارتی بحری ساحلی تنصیب دوارکا دے خلاف پاک بحریہ دا جرأت مندانہ آپریشن سومناتھ اساکوں اپݨی بحریہ دے شاندار ماضی دی یاد ݙویندے، اے آپریشن نہ صرف پاک بحریہ دی بہادری تے ثابت قدمی دا مظہر ہئی ٻلکہ ایں ہک ایہو جہیں ضبوط قوت دی بنیاد رکھݨ اچ وی اہم کردار ادا کیتا ڄہڑی خود اعتمادی تے دشمن دے دل اچ خوف پیدا کرݨ دے غیر متزلزل عزم نال لیس ہئی تے ملک دے بحری دفاع کوں ٻیا تکرا بݨاوݨ کیتے پرعزم رہی۔ انہاں آکھیا جو 1965ء دے انہاں تاریخی واقعات دے بعد توں پاک بحریہ اپݨی بحری سرحداں دے دفاع اچ ایں جذبہ شجاعت تے عزم کوں برقرار رکھیے۔ معرکہ حق دے دوران مئی 2025ء اچ پاک بحریہ اپݨی آپریشنل تیاری تے پیشگی تعیناتیاں دے ذریعے دشمن کوں موثر طور تے باز رکھیندے پاکستان دے بحری مفادات دے تحفظ اچ اہم کردار ادا کیتا۔ ایں دے نتیجے اچ عددی برتری رکھݨ آلی بھارتی بحریہ کوں قابو اچ رکھیا ڳئے تے اونکوں پاکستان دی بحری سلامتی کوں خطرے اچ سٹݨ دا کوئی موقع نی ݙتا ڳیا۔ صدرِ مملکت آصف علی زرداری آکھیا جو ہݨے ہی اچ مشرقِ وسطیٰ اچ جاری جھیڑے دے دوران وی پاک بحریہ آپریشن محافظُ البحر دے ذریعے قومی سلامتی دے تحفظ کیتے اپݨے عزم تے ذمہ واری دا مظاہرہ کیتا۔ انہاں آکھیا جو پاک بحریہ ملک دی توانائی سلامتی تے اقتصادی شہ رڳ دے تحفظ اچ فوری تے نمایاں کردار ادا کریندے ضروری سمندری ذرائع توں توانائی ݙیوݨ دے تسلسل کوں یقینی بݨایا۔ پاک بحریہ عصرِ حاضر دیاں تکنیکی ترقیاں نال ہم آہنگ رہندے اپݨی صلاحیتاں کوں وی جدید خطوط تے استوار کریندی پئی اے، جدید جنگی بحری جہازاں، تزویراتی اہمیت دی حامل ہنگور کلاس آبدوزاں، جیٹ طیاریں، بغیر پائلٹ دے نظام تے مقامی طور تے تیار کیتے ڳئے طویل فاصلے تئیں مار کرݨ آلے میزائلاں دی شمولیت ایں ڳالھ دی عکاس اے جو پاک بحریہ ہک جدید تے موثر بحری قوت برقرار رکھݨ کیتے پوری توجہ تے عزم دے نال اڳوں ودھدی پئی اے جہڑی پاکستان دے بحری مفادات دا تحفظ کرݨ دی بھرپور صلاحیت رکھیندی اے۔ صدرِ مملکت آکھیا جو قومی سلامتی تے ساݙیاں سمندری حدود دی سالمیت یقینی بݨاوݨ توں علاوہ پاک بحریہ بحری سفارتکاری تے علاقائی سلامتی دے ودھارے اچ وی فعال کردار ادا کریندی پئی اے، کثیر ملکی بحری مشق امن تے امن ڈائیلاگ دے ذریعے پاک بحریہ ’’امن کیتے نال نال‘‘ دے عنوان دے تحت بین الاقوامی تعاون کوں ودھارا ݙیندی پئی اے۔ صدرِ مملکت آکھیا جو پاک بحریہ قومی تے علاقائی ہنگامی حالات دے دوران ہک قابلِ اعتماد ’’فرسٹ رسپانڈر‘‘ دے طور تے خذمتاں انجام ݙیندے اہم انسانی امداد تے آفتاں نال نبڑݨ کیتے امدادی سرگرمیاں اچ وی بھرپور کردار ادا کریندی پئی اے۔ صدرِ مملکت آصف علی زرداری آکھیا جو اساں جݙاں اوکھے بحری چیلنجز دا سامݨا کریندے پیوں تاں میں مسلح افواج دی مسلسل جدید کاری تے استعدادِ کار اچ ودھارے کیتے ریاست دے غیر متزلزل عزم دا اعادہ کرینداں، میکوں پاک بحریہ تے مکمل اعتماد اے جو اپݨی اعلیٰ پیشہ ورانہ اقدار تے تکنیکی برتری دے نال او بہادری، وقار تے پیشہ ورانہ مہارت دے ذریعے پاکستان دے بحری مفادات دا تحفظ جاری رکھیسی