اوسلو۔ 10 ستمبر (اے پی پی) ناروے دے بادشاہ ہرالڈ پنجم دی آخری رسومات اچ پاکستان دی نمائندگی کرݨ کیتے وفاقی وزیرِ مواصلات عبدالعلیم خان اوسلو پڄ ڳئے جتھاں انہاں آنجہانی کنگ دی سرکاری تدفین اچ شرکت کیتی اتے ناروے دے شاہی خاندان تے عوام نال صدر، وزیرِ اعظم تے پاکستانی عوام ولوں دلی پرچاوݨی تے ہمدردی دا اظہار کیتا۔ ایں موقع تے وفاقی وزیر عبدالعلیم خان ناروے دے نویں …
ناروے دے بادشاہ ہرالڈ پنجم دی آخری رسومات، وفاقی وزیر عبدالعلیم خان دی نمائندگی
مزید خبراں
اوسلو۔ 10 ستمبر (اے پی پی) ناروے دے بادشاہ ہرالڈ پنجم دی آخری رسومات اچ پاکستان دی نمائندگی کرݨ کیتے وفاقی وزیرِ مواصلات عبدالعلیم خان اوسلو پڄ ڳئے جتھاں انہاں آنجہانی کنگ دی سرکاری تدفین اچ شرکت کیتی اتے ناروے دے شاہی خاندان تے عوام نال صدر، وزیرِ اعظم تے پاکستانی عوام ولوں دلی پرچاوݨی تے ہمدردی دا اظہار کیتا۔ ایں موقع تے وفاقی وزیر عبدالعلیم خان ناروے دے نویں بادشاہ کنگ ہاکون ہشتم نال وی ملاقات کیتی تے انہاں کوں پاکستان دی قیادت تے عوام ولوں پرچاوݨی تے نیک خواہشات پیش کیتی۔ عبدالعلیم خان اوسلو سٹی ہال اچ تھیوݨ آلی تعزیتی تقریب اچ ناروے دے وزیرِ خارجہ ایسپن بارتھ ایڈے، وزیرِ خزانہ تے نیٹو دے سابق سیکرٹری جنرل جینز اسٹولٹنبرگ، ناروے دی وزیرِ ثقافت لبنیٰ جعفری تے عالمی ترقی دے وزیر آسمند اوکرست نال وی ملاقاتاں کیتی اتے انہاں نال ݙکھ تے افسوس دی ایں گھڑی اچ دلی ہمدردی دا اظہار کیتا۔ ایں موقع تے پاکستان تے ناروے دے آپسی تعلقات، ݙوپاسہ تعاون تے آپسی دلچسپی دے معاملیاں تے ڳالھ مہاڑ کیتی ڳئی۔ وفاقی وزیر عبدالعلیم خان نال ملاقات کرݨ آلیاں اچ سیکرٹری اسٹیٹ اینڈریز موتزفیلٹ کراوک تے میئر اوسلو اینی لنڈبو شامل ہن۔ ملاقاتاں اچ پاکستان تے ناروے دے درمیان تعلقات تے مختلف شعبیاں اچ تعاون دے ودھارے تے ڳالھ تھئی۔ ایں موقع تے ڳالھ مہاڑ کریندیں ہوئیں وفاقی وزیر عبدالعلیم خان آکھیا جو پاکستان تے ناروے دے دیرینہ دوستانہ تعلقات آپسی احترام، اعتماد تے تعاون تے مبنی ہن۔ ݙوہیں ملکاں وچال تعلقات کوں ٻیا مضبوط تے مختلف شعبیاں اچ آپسی تعاون کوں فروغ ݙیوݨ کیتے پاکستان پرعزم اے۔ وفاقی وزیر ناروے دے بادشاہ ہرالڈ پنجم دی آخری رسومات اچ شرکت کوں پاکستان ولوں شاہی خاندان تے ناروے دی عوام دے نال یکجہتی تے احترام دا اظہار قرار ݙتا۔
