وفاقی وزیر بورڈ آف انویسٹمنٹ قیصر احمد شیخ نال روانڈا دی پاکستان اچ ہائی کمشنر ہریریمانا فاتو دی ملاقات

اسلام آباد۔ 10 ستمبر(اے پی پی) وفاقی وزیر بورڈ آف انویسٹمنٹ قیصر احمد شیخ نال روانڈا دی پاکستان اچ ہائی کمشنر ہریریمانا فاتو ملاقات کیتی۔ ملاقات اچ ݙوہیں ملکاں وچال ݙوطرفہ تجارت، سرمایہ کاری تے معاشی تعاون کوں ٻیا ودھارا ݙیوݨ دی اہمیت تے زور ݙتا ڳیا۔ ہائی کمشنر وفاقی وزیر کوں 23 توں 25 ستمبر 2026ء کوں کیگالی اچ منعقد تھیوݨ آلے “روانڈا-پاکستان سرمایہ کاری فورم” اچ شرکت دی باضابطہ دعوت ݙتی۔ انہاں ݙسایا جو انہاں دی تعیناتی بعد ݙوہیں ملکاں وچال کاروباری سرگرمیاں اچ 55 فیصد توں ودھ ودھارا تھئے۔ روانڈا دے پاسوں پاکستان توں دوائیاں، ٹیکسٹائل، چاول تے ٻیاں مصنوعات دی برآمدات دے نال باقاعدہ معاہدیں (ایم او یو) تے آن لائن اجلاساں دے ذریعے ادارہ جاتی تعاون کوں اڳوں ودھاوݨ دی خواہش دا اظہار کیتا ڳیا۔ ہائی کمشنر روانڈا دی چاہ تے کافی دی براہِ راست پاکستان آوݨ تے زور ݙیندے ݙسایا جو روانڈا دا ہک تجارتی وفد اکتوبر 2026ء اچ پاکستان دا دورہ کریسی۔ وفاقی وزیر قیصر احمد شیخ روانڈا دے وفد کوں مکمل سہولت کاری دی یقین ݙویندے آکھیا جو افریقی مارکیٹ پاکستانی کاروبار کیتے بے پناہ موقع رکھیندی اے تے پاکستان، روانڈا دے نال تجارتی رابطے کوں ہر ممکن وسعت ݙیوݨ کیتے پرعزم اے۔