صوبہ ہزارہ سودھے نویں صوبے ویلھے دی اہم لوڑھ ہن، سردار محمد یوسف

اسلام آباد۔ 10 ستمبر (اے پی پی) وفاقی وزیرِ مذہبی امور و چیئرمین صوبہ ہزارہ تحریک سردار محمد یوسف آکھیے جو پاکستان اچ نویں صوبے بݨاوݨ ویلھے دی اہم لوڑھ اے ، صوبہ ہزارہ دے قیام دے حوالے نال اسمبلیاں اچ وقتاً فوقتاً قرارداداں پیش تھیندیاں ریہاں ہن، ہݨ لوڑھ ایں ڳالھ دی اے جو ایں معاملے تے باضابطہ قومی سطح تے بحث کیتی ونڄے تے اختیارات دے نال چھوٹے انتظامی یونٹس قائم کیتے ونڄن تاں جو عوام کوں انہاں دی دہلیز تے سہولتاں ݙتیاں ونڄ سڳن۔ او ہزارہ جرنلسٹس ایسوسی ایشن دے زیرِ اہتمام نیشنل پریس کلب اسلام آباد اچ “صوبیں تے انتظامی یونٹس متعلق قومی مباحثہ” نال خطاب کریندے پئے ہن۔ مباحثے اچ مختلف سیاسی جماعتاں دے رہنماواں، اراکینِ پارلیمنٹ، صحافیاں، دانشوراں تے سول سوسائٹی دے نمائندیں شرکت کیتی تے نویں صوبیں و انتظامی یونٹس دے قیام دے حوالے نال اپݨے خیالات دا اظہار کیتا۔ سردار محمد یوسف آکھیا جو ساریاں سیاسی جماعتاں ایں ڳالھ تے متفق ہن جو صوبہ ہزارہ قائم تھیوݨا چاہیدے، اساں اقتدار اچ ہووں یا نہ ہووں، صوبہ ہزارہ دے قیام دی تحریک چلیندے ریہوں تے اڳوں وی ایں کیتے آواز چیندے رہسوں ۔ انہاں آکھیا جے پاکستان اچ ڈویژن تے ٻئے انتظامی یونٹس قائم کیتے ونڄ سڳدن تاں نویں صوبے کیوں نی بݨ سڳدے؟ اساں بہتر انتظامی نظام تے عوام کوں ودھ توں ودھ سہولتاں ݙیوݨ چاہندوں۔ سینیٹ دی قائمہ کمیٹی دفاع دے چیئرمین سینیٹر طلحہ محمود خطاب کریندے آکھیا جو او وݙے عرصے توں صوبہ ہزارہ دے قیام دے حوالے نال آواز چیندے ریہن تے 2010ء اچ وی سینیٹ اچ ایں معاملے کوں چاتا ہئی ۔ انہاں آکھیا جو صوبہ ہزارہ دے قیام تے ہک طویل عرصے توں ڳالھ تھیندی پئی اے، ایں مسئلے کوں مزید نظرانداز نی کیتا ونڄݨا چاہیدا، سینیٹر طلحہ محمود آکھیا جو این ایف سی ایوارڈ دے تحت جے 400 ارب روپے ݙتے ویندن تاں اے وی ݙٹھا ونڄݨا چاہیدے جو انہاں اچوں کتنی رقم اضلاع تے تحصیلاں تئیں پڄدی پئی اے۔ سابق وفاقی وزیر محمد علی درانی آکھیا جو نویں صوبیں دا قیام ایں ویلھے پاکستان دی لوڑھ اے ، صوبائی اسمبلیاں ایں حوالے نال متفقہ قرارداداں منظور کر چکئن، ایں دے باوجود معاملے کوں روک تے رکھیا ڳئے۔ محمد علی درانی آکھیا جو نویں صوبیں دا قیام پاکستان دے مفاد دی ڳالھ اے۔ انہاں آکھیا جو ہک واری اسمبلی توں قرارداد منظور تھیوݨ دے بعد او محض نظرانداز کرݨ نال ختم نی تھی ویندی، جے کہیں قرارداد کوں ختم کرݨ مقصود ہووے تاں ایں دے خلاف باقاعدہ قرارداد منظور کرݨ ضروری اے۔ تحریکِ انصاف دے رکنِ قومی اسمبلی شہزادہ گستاسپ خان آکھیا جو ہر تحریک دے پچھوں ہک واضح مقصد ہووݨا چاہیدے تے صوبیں دا قیام بنیادی طور تے ہک انتظامی معاملہ اے، بہتر گورننس کیتے انتظامی یونٹ جتنا چھوٹا ہوسی، ایں کوں اتناء ہی بہتر انداز اچ چلایا ونڄ سڳسی۔