وفاقی وزیرِ توانائی سردار اویس احمد خان لغاری نال برٹش انٹرنیشنل انویسٹمنٹ دے اعلیٰ سطحی وفد دی ملاقات

اسلام آباد۔ 10 ستمبر(اے پی پی) وفاقی وزیرِ توانائی سردار اویس احمد خان لغاری نال برٹش انٹرنیشنل انویسٹمنٹ (بی آئی آئی) دے اعلیٰ سطحی وفد ملاقات کیتی جیندے اچ پاکستان دے توانائی دے شعبے بالخصوص ٹرانسمیشن نیٹ ورک دی جدید کاری، بیٹری سٹوریج سسٹمز تے نجی سرمائے ݙیوݨ اچ سانجھے تعاون دے موقعیں تے تفصیلی ڳالھ کیتی ڳئی ۔ ترجمان پاور ڈویژن موجب بی آئی آئی دے ایم ڈی تے ہیڈ آف ایشیا سری نی ناگراجن دی قیادت اچ وفد وفاقی وزیر کوں بی آئی آئی دے تاریخی پسِ منظر تے عالمی کارکردگی دا ݙسایا ۔1987ء توں پاکستان اچ متحرک ایں ادارے ملک اچ تقریباً 600 ملین ڈالر دی سرمایہ کاری دا عزم ظاہر کر رکھیے تے او طویل المدتی شراکت داری کوں ٻیا ودھارا ݙیوݨ چاہندے۔وفد اپݨے ترائے بنیادی شعبیں، کلائمیٹ اینڈ انفراسٹرکچر، انفارمیشن ٹیکنالوجی و سروسز تے فنانشل سروسز دی کارکردگی کوں اجاگر کیتا۔ عالمی سطح تے پاور پلانٹس تے ٹرانسمیشن گرڈز دے وسیع تجربے دی روشنی اچ وفد پاکستان دے ٹرانسمیشن سیکٹر تے نجی سرمائے دے ذریعے انفراسٹرکچر دی بہتری اچ دلچسپی دا اظہار کیتا۔ وفاقی وزیر سردار اویس احمد خان لغاری وفد دا خیرمقدم کریندے آکھیا جو حکومت اڳلے 8 توں 10 سال کیتے توانائی دی منتقلی تے نیشنل گرڈ دی بہتری دا ہک واضح تے جامع فریم ورک تیار کیتے۔ انہاں ݙسایا جو بجلی دی منگ، ترسیلی ضرورتاں تے تکنیکی تقاضیں کوں سامݨے رکھیدنے انٹیگریٹڈ سسٹم پلان حتمی مرحلیں اچ اے۔ ایں ادارتی منصوبہ بندی دا مقصد ماضی دے غیر متوازن فیصلیں دا خاتمہ تے سرمایہ کاراں کوں ہک مستحکم، پیشنگوئی دے قابل ماحول ݙیوݨ اے۔ وفاقی وزیر ایں ڳالھ تے زور ݙتا جو حکومت دی اولین ترجیح صارفین تے مالی ٻوجھ کوں گھٹ توں گھٹ رکھݨا اے۔ حکومت ترسیلی نظام دے درآمدی اجزاء کیتے غیر ملکی سرمایہ کاری دے نال مقامی پیداوار دے پروگرام کوں ترجیحی بنیاداں تے اڳوں ودھیندی پئی اے۔