وفاقی وزیرِ صحت دی صدارت اچ اجلاس، مریضاں تے طبی عملے دی حفاظت کیتے ضروری اصلاحات ترجیحی بنیاداں تے مکمل کرݨ دی ہدایت

اسلام آباد۔23 ستمبر (اے پی پی) وفاقی وزیرِ صحت مصطفیٰ کمال دی زیرِ صدارت اہم اجلاس منعقد تھیا، جیندے اچ وزارتِ صحت دے متعلقہ اعلیٰ حکام تے افسران شرکت کیتی۔ وزارتِ صحت توں جاری بیان موجب وفاقی وزیرِ صحت مصطفیٰ کمال ہدایت کیتی جو مریضاں، طبی عملے تے عوام دی حفاظت کیتے ضروری اصلاحات ترجیحی بنیاداں تے مکمل کیتیاں ونڄن۔ اجلاس اچ وزارتِ قومی صحت دے زیرِ انتظام سارے اداریں اچ فائر سیفٹی تے بنیادی انفراسٹرکچر دی جامع اصلاحات دا جائزہ ڳھدا ڳیا۔ ایں موقع تے وزارتِ صحت دے زیرِ انتظام سارے ہسپتالاں، بنیادی مراکزِ صحت تے دیہی مراکزِ صحت دے تکنیکی تے بنیادی ڈھانچے دا جامع جائزہ گھنݨ دا فیصلہ کیتا ڳیا۔ انہاں آکھیا جو صحت دے اداریں دے انفراسٹرکچر دا تفصیلی جائزہ گھنݨ کیتے ماہر کنسلٹنسی فرم دیاں خدمات حاصل کیتیاں ویندیاں پئن۔ کنسلٹنسی فرم صحت مراکز اچ فائر سیفٹی، بجلی دے نظام، ہیٹنگ، وینٹی لیشن تے ایئر کنڈیشننگ سودھے میڈیکل گیسز دے نظام دا جائزہ گھنسی۔ ایں توں علاوہ صحت دے اداریں اچ موجود بائیومیڈیکل آلات تے طبی فضلے دے انتظام دے نظام دا وی تفصیلی جائزہ ڳھدا ویسے۔ اجلاس کوں ݙسایا ڳیا جو انفراسٹرکچر دے جامع جائزے دی بنیاد تے ضروری اصلاحات کیتے عملی منصوبہ تیار کیتا ویندا پئے، تاں جو صحت دے اداریں اچ حفاظتی انتظامات کوں مزید مؤثر بݨایا ونڄ سڳے۔ اجلاس اچ جوائنٹ سیکرٹری ہسپتال، ڈائریکٹر جنرل ہیلتھ، جوائنٹ سیکرٹری ایڈمن تے ٻئے متعلقہ افسران شریک تھئے۔