بلوچستان اچ سکیورٹی فورسز دیاں وݙیاں کارروائیاں، بھارتی سرپرستی اچ سرگرم 19 دہشتگرد ہلاک، نائب صوبیدار محمد جمیل شہید، آئی ایس پی آر

راولپنڈی۔23 ستمبر(اے پی پی)سکیورٹی فورسز بلوچستان دے مختلف علاقیاں اچ موثر کارروائیاں اچ بھارتی سرپرستی اچ سرگرم مجموعی طور تے 19 دہشت گرداں کوں جہنم واصل کر ݙتے۔ شدید فائرنگ دے تبادلے اچ مادرِ وطن دا ہک بہادر سپوت شہید تھئے۔ پاک فوج دے شعبہ تعلقات عامہ (آئی ایس پی آر) دے مطابق ضلع کوئٹہ دے علاقے شعبان اچ سکیورٹی فورسز دا 21 ستمبر توں انٹیلی جنس بیسڈ کلیئرنس آپریشن کامیابی نال جاری اے ۔ آپریشن اچ سکیورٹی فورسز دہشت گرداں دے کئی ٹھکانے تباہ کر تے کلیئر کر ݙتن جتھاں شدید فائرنگ نال بھارتی سرپرستی اچ سرگرم 13 دہشتگرد مارے ڳئے ۔ کلیئر کیتے ڳئے ٹھکانیاں توں بھاری مقدار اچ اسلحہ، گولہ بارود اتے دھماکا خیز مواد وی ملیے ۔ آئی ایس پی آر دا آکھݨ اے جو علاقے اچ دہشت گردی دے خطرے دے مکمل خاتمے تئیں کلیئرنس آپریشن جاری رہسی۔ ایں دوران سکیورٹی فورسز 22 اتے 23 ستمبر کوں ضلع کیچ اتے کوئٹہ ویسٹ اچ خفیہ اطلاعات دی بنیاد تے ٻیاں کارروائیاں کیتن جیندے اچ شدید جھڑپ اچ ٻئے 6 دہشتگرد ہلاک کر ݙتے ڳئے اتے انہاں دے قبضے توں اسلحہ و گولہ بارود ملیے۔ شدید فائرنگ اچ وطنِ عزیز دے دفاع اچ بہادری نال لڑدے ہوئیں 39 سالہ نائب صوبیدار محمد جمیل شہید تھی ڳئے ۔ شہید نائب صوبیدار دا تعلق تونسہ شریف، ضلع ڈیرہ غازی خان توں ہئی۔ آئی ایس پی آر واضح کیتے جو ‘عزمِ استحکام’ دے وژن دے تحت غیر ملکی سرپرستی اچ تھیوݨ والی دہشت گردی دے خلاف کارروائیاں بلا امتیاز جاری رہسن۔ سکیورٹی فورسز تے قانون نافذ کرݨ والے ادارے ملک توں بیرونی پشت پناہی رکھݨ والی دہشت گردی دے مکمل خاتمے کیتے پرعزم ہین۔