وفاقی وزیر سرمایہ کاری بورڈ دی ورلڈ اکنامک فورم دے مکالمے اچ شرکت، پاکستان اچ جامع ریگولیٹری اصلاحات، سرمایہ کاراں کیتے سہولت کاری دے اقدامات کوں اجاگر کیتا

نیویارک۔24 ستمبر (اے پی پی) وفاقی وزیر بورڈ آف انویسٹمنٹ قیصر احمد شیخ نیویارک اچ ورلڈ اکنامک فورم دے اعلیٰ سطحی مکالمے اچ شرکت کریندے پاکستان اچ جاری جامع ریگولیٹری اصلاحات، سرمایہ کاراں کیتے سہولت کاری دے اقدامات تے برآمدی سرمایہ کاری دے ودھدے موقع کوں اجاگر کیتا۔انہاں ݙسایا جو حکومت کاروباری ماحول کوں سوکھا تے شفاف بݨاوݨ کیتے پرعزم اے، جیندے تحت 30 شعبیں اچ 500 توں ودھ اصلاحات نافذ کیتیاں ونڄ چکئن جݙاں جو سوکھا کاروبار ایکٹ 2025 تے پاکستان بزنس پورٹل جیھے اقدامات نال ریگولیٹری نظام کوں مزید جدید بݨایا ڳئے۔ اسلام آباد اچ قائم بزنس فیسلی ٹیشن سینٹر دے ذریعے 22 وفاقی اداریں کوں ھک ہی چھت تلے جمع کیتا ڳئے، جئیں ابتدائی اٹھ مہینے اچ ہزاراں کاروباری اداریں کوں سہولت ݙیندے 5.08 ارب روپے دی سرمایہ کاری اچ معاونت کیتی اے۔انہاں مزید آکھیا جو پاکستان جدید ٹیکنالوجی تے آرٹیفیشل انٹیلی جنس دے مساوی تے محفوظ استعمال کیتے متوازن پالیسیاں اپنیندا پئے۔ ملک دی انویسٹمنٹ پالیسی 2023 دے تحت غیر ملکی سرمایہ کاراں کوں 100 فیصد ملکیت تے منافع واپس گھن ونڄݨ دی اجازت اے، جݙاں جو 44 سپیشل اکنامک زونز اچ 2035ء تئیں انکم ٹیکس تے کسٹمز ڈیوٹی توں استثنیٰ جیھی مراعات وی حاصل ہن۔ پاک چین بی ٹو بی کانفرنس دی کامیابی دا ذکر کریندے ، جتھاں 9.5 ارب ڈالر دے معاہدے تھئے، وفاقی وزیر اعلان کیتا جو پاکستان ایں ماڈل کوں ٻئے عالمی منڈیاں تئیں وسعت ݙیوݨ چاہندے۔ انہاں بین الاقوامی سرمایہ کاراں کوں قابلِ تجدید توانائی، زراعت، معدنیات، انفراسٹرکچر تے ٹیکنالوجی دے شعبیں اچ سرمایہ کاری دی دعوت ݙتی تے ایں عزم دا اعادہ کیتا جو بورڈ آف انویسٹمنٹ پاکستان کوں پائیدار تے مسابقتی سرمایہ کاری دا مرکز بݨاوݨ کیتے کوشاں اے۔