بلوچستان تے خیبر پختونخوا اچ کارروائیاں دے دوران 11 دہشت گرداں دی ہلاکت تے محسن نقوی دا سکیورٹی فورسز کوں خراجِ تحسین

اسلام آباد۔3 اکتوبر (اے پی پی) وفاقی وزیرِ داخلہ محسن نقوی بلوچستان تے خیبر پختونخوا اچ ‘خوارج’ دے خلاف خفیہ معلومات تے مبنی کامیاب آپریشنز کرݨ تے سکیورٹی فورسز کوں خراجِ تحسین پیش کیتا، آپریشنز دے دوران مجموعی طور تے 11 دہشت گرد ہلاک کر ݙتے ڳئے۔وزارتِ داخلہ موجب وفاقی وزیر ہفتے کوں اپݨے بیان اچ دہشت گرداں دے منصوبیں کوں ناکام بݨاوݨ تے سکیورٹی فورسز دی تعریف کیتی تے آپریشنز دے دوران انہاں دی پیشہ ورانہ صلاحیتاں دا اعتراف وی کیتا۔ محسن نقوی آکھیا جو سکیورٹی فورسز جنوبی وزیرستان اچ خفیہ معلومات تے مبنی آپریشن دے دوران پنج خوارج کوں ہلاک کیتا۔ انہاں مزید ݙسایا جو بلوچستان دے علاقے ماشکیل اچ ہک ٻئی کارروائی دے دوران مزید چھی خوارج مارئے ڳئن۔وزیرِ داخلہ آکھیا جو قوم کوں سکیورٹی فورسز دے انہاں بہادر جواناں تے ماݨ اے جو دہشت گردی دے خلاف جنگ اچ اپݨے فرائض سرانجام ݙیندے پئن۔ انہاں دہشت گرد عناصر دے خلاف کارروائی اچ انہاں دیاں کوششاں تے عزم دی تعریف کیتی ۔ محسن نقوی آکھیا جو دہشت گردی دے خلاف جاری مہم اچ پوری قوم سکیورٹی فورسز دے رلے کھڑی اے۔ انہاں ایں گالھ تے زور ݙتا جو امن تے استحکام برقرار رکھݨ دیاں کوششاں کوں تکڑا بݨاوݨ اچ عوامی حمایت ہک اہم عنصر اے۔