پاکستان بھارتی بارڈر سیکیورٹی فورسز دی پاسوں اپݨے ݙو شہریاں دے قتل تے بھارتی ناظم الامور کوں طلب کرتے شدید احتجاج ریکارڈ کروایا، ترجمان دفترِ خارجہ

اسلام آباد۔3 اکتوبر(اے پی پی) پاکستان بھارتی بارڈر سیکیورٹی فورسز دی پاسوں اپݨے ݙو شہریاں دے قتل تے بھارتی ناظم الامور کوں طلب کر تے شدید احتجاج ریکارڈ کروائے جݙاں جو واضح کیتا ڳیا جو پاکستان جاں بحق تھیاں کوں ”درانداز“ قرار ݙیوݨ دی کہیں وی کوشش کوں واضح طور تے مسترد کریندے، بھارت بنیادی انسانی حقوق تے بین الاقوامی قانون دا احترام یقینی بݨائے تے متعلقہ ݙو طرفہ انتظامات تے مسلمہ سرحدی طریقہ کار دی سختی نال پابندی کرے۔ہفتے کوں ترجمان دفترِ خارجہ دی پاسوں جاری بیان اچ آکھیا ڳئے جو وزارتِ خارجہ اچ بھارتی ناظم الامور کوں طلب کیتا ڳئے تاں جو بین الاقوامی سرحد دے بیدیاں سیکٹر اچ 2 اکتوبر 2026ء کوں بھارتی بارڈر سیکیورٹی فورس (بی ایس ایف) دے اہلکاراں دی پاسوں ݙو پاکستانی شہریاں دے قتل تے پاکستان دا شدید احتجاج درج کروایا ونڄ سڳے۔ بی ایس ایف دے اہلکاراں غیر مسلح شہریاں دے خلاف بلا اشتعال مہلک طاقت دا استعمال کیتا۔ترجمان آکھیا جو طاقت دا اے استعمال قطعی طور تے غیر ضروری تے انتہائی غیر متناسب ہئی جیندے نتیجے اچ ݙو قیمتی جاناں ضائع تھئن۔ ترجمان واضح کیتا جو پاکستان جاں بحق تھیوݨ آلیں کوں ”درانداز“ قرار ݙیوݨ دی کہیں وی کوشش کوں واضح طور تے مسترد کریندے، ایں گالھ تے زور ݙتا ڳیا جو اے واقعہ بنیادی انسانی حقوق، بشمول زندگی دے حق دی سنگین خلاف ورزی اے تے بین الاقوامی قانون دے تحت شہری زندگی دے تحفظ متعلق سنگین خدشات پیدا کریندے۔ترجمان موجب بھارت کوں آکھیا ڳئے جو او ایں واقعے دی فوری، شفاف تے قابلِ اعتماد تحقیقات کرے، ذمہ دار لوکاں دے خلاف مناسب تادیبی تے قانونی کارروائی کرے تے پاکستان حکومت کوں تحقیقات دے نتائج تے کیتی ڳئی کارروائی توں باضابطہ طور تے آگاہ کرے۔ ترجمان موجب بھارت توں مزید آکھیا ڳئے جو او بنیادی انسانی حقوق تے بین الاقوامی قانون دا احترام یقینی بݨاوے، متعلقہ ݙو طرفہ انتظامات تے مسلمہ سرحدی طریقہ کار دی سختی نال پابندی کرے، ایہوجیھے حالات نال نبڑݨ اچ ٻہوں ضبط توں کم گھنے تے ایہوجہے واقعات دے ول تھیوݨ توں روکݨ کیتے موثر اقدامات کرے۔