وزیراعظم شہباز شریف دی جمہوریہ آذربائیجان دے صدر الہام علیوف نال ٹیلی فونک ڳالھ مہاڑ، ݙوہیں رہنماواں دا سیاسی ہم آہنگی کوں اقتصادی تے تجارتی شراکت داری اچ بدلݨ تے اتفاق

اسلام آباد۔10 اکتوبر (اے پی پی) وزیراعظم محمد شہباز شریف تے جمہوریہ آذربائیجان دے صدر الہام علیوف ݙاوائیں ملکاں وچال مثالی سیاسی ہم آہنگی کوں مضبوط اقتصادی، سرماے کاری تے تجارتی شراکت داری اچ تبدیل کرݨ تے اتفاق کیتے۔ ہفتے کوں وزیراعظم آفس دے میڈیا ونگ توں جاری بیان دے مطابق وزیراعظم محمد شہباز شریف جمہوریہ آذربائیجان دے صدر الہام علیوف نال ٹیلی فون تے ڳالھ مہاڑ کیتی، ݙوہیں رہنماواں پاکستان تے آذربائیجان وچال برادرانہ تعلقات تے دیرینہ دوستی دا اعادہ کیتا۔ وزیراعظم آذربائیجان دے نال پاکستان دی گہری، برادرانہ تے اسٹریٹجک شراکت داری دا اعادہ کریندیں ہوئیں آکھیا جو ݙاوائیں ملکاں دے تعلقات آپسی اعتماد تے اہم قومی مفادات دے معاملیاں تے ہک ٻئے دی بھرپور حمایت تے مبنی ہن۔ ݙوپاسہ تعلقات دا جائزہ گھندے ہوئیں ݙوہیں رہنماواں اتفاق کیتا جو ݙوہیں ملکاں وچال مثالی سیاسی ہم آہنگی کوں ہݨ مضبوط اقتصادی، سرماے کاری تے تجارتی شراکت داری اچ تبدیل کرݨ ضروری اے۔ وزیراعظم آکھیا جو پاکستان دے عوام صدر الہام علیوف تے آذربائیجان دے برادر عوام کوں انتہائی قدر دی نگاہ نال ݙیکھدن۔ ݙوہیں رہنماواں مختلف شعبیاں اچ ݙوپاسہ تعاون اچ ودھدی تھئی پیشرفت تے اطمینان دا اظہار کیتا تے ایں عزم دا اعادہ کیتا جو ݙوہیں ملکاں دے درمیان غیر معمولی سیاسی خیرسگالی تے ہم آہنگی کوں آپسی فائدے تے مبنی اقتصادی، سرماے کاری تے تجارتی شراکت داری اچ بدلیا ویسے۔ ݙوپاسہ منصوبیاں تے پیشرفت دا جائزہ گھندے ہوئیں ݙوہیں رہنماواں اسلام آباد اچ آسان خدمت مرکز دی مثبت پیشرفت تے خصوصی اطمینان دا اظہار کیتا۔ آذربائیجان دے ’’آسان خدمت‘‘ نظام دی طرز تے قائم ایں مرکز کوں ݙوہیں ملکاں دی برادرانہ شراکت داری دے عوام کیتے عملی فوائداں دی ہک نمایاں مثال قرار ݙتا ڳیا۔ وزیراعظم دی درخواست تے صدر الہام علیوف پورے پاکستان اچ آسان خدمت مراکز دے نیٹ ورک کوں وسعت ݙیوݨ کیتے آذربائیجان دی مکمل معاونت تے مہارت فراہم کرݨ تے اتفاق کیتا۔ وزیراعظم ایں تعاون تے صدر علیوف دا شکریہ ادا کریندیں ہوئیں ایں کوں پاکستان دے نال آذربائیجان دی دیرینہ دوستی تے یکجہتی دا ہک ٻیا ثبوت قرار ݙتا۔ ݙوہیں رہنماواں خطے تے عالمی سطح تے بدلدی تھئی صورتحال تے وی ڳالھ مہاڑ کیتی اتے مشترکہ دلچسپی دے معاملیاں تے مسلسل مشاورت تے قریبی رابطیاں دی اہمیت تے زور ݙتا۔ وزیراعظم صدر الہام علیوف کوں خطے اچ امن دے فروغ، مذاکرات تے کشیدگی اچ کمی کیتے پاکستان دی مسلسل سفارتی کوششاں تے مثبت کردار دا ݙسیا۔ صدر علیوف مذاکرات، ثالثی تے کشیدگی اچ ڳھٹکی کیتے پاکستان دیاں تعمیری سفارتی کوشساں کوں سراہندے ہوئیں علاقائی امن تے استحکام کیتے انہاں دی اہمیت دا اعتراف کیتا۔