پارلیمنٹ دے سانجھے اجلاس اچ صوبہ خیبر پختونخوا اچ ہنگامی حالت دے حآلے نال دستور دے آرٹیکل 232(7) تے 234(1) دے تحت قرارداداں پیش

اسلام آباد۔15 اکتوبر (اے پی پی) پارلیمنٹ دے سانجھے اجلاس اچ قواعد معطل کر تے صوبہ خیبر پختونخوا اچ ہنگامی حالت دے حآلے نال دستور دے آرٹیکل 232(7) تے دستور دے آرٹیکل 234(1) دے تحت قرارداداں پیش کر ݙتیاں ڳئیاں۔ خمیس کوں وفاقی وزیر برائے پارلیمانی امور ڈاکٹر طارق فضل چاودری پارلیمنٹ دے سانجھے اجلاس اچ تحریک پیش کیتی جو دستور دے آرٹیکل 232 دی شق (7) تے آرٹیکل 234 دی شق (3) دے مطابق قرارداداں پیش کرݨ کیتے متعلقہ قواعد معطل کیتے ون٘ڄن۔ ایں معاملے تے سپیکر ایوان توں اپوزیشن دے اصرار تے ارکان کوں باقاعدہ کھڑا کر تے رائے شماری کروائی تاں تحریک دے حق اچ ایوان دی وݙی اکثریت یعنی 214 ارکان ووٹ ݙتا۔ ایں طرح اے تحریک کثرتِ رائے نال منظور کر گھدی ڳئی جیندے بعد ڈاکٹر طارق فضل چاودری ایوان اچ قرارداد پیش کیتی جو اسلامی جمہوریہ پاکستان دے دستور دے آرٹیکل 232 دی شق (1) دے ݙوجھے جملہ شرطیہ دے تحت 11 اکتوبر 2026ء کوں صدرِ مملکت توں صوبہ خیبر پختونخوا اچ ہنگامی حالت دے اعلان کوں سانجھے اجلاس اسلامی جمہوریہ پاکستان دے دستور دے آرٹیکل 232 دی شق (7) دے تحت منظور کریندے۔ ݙوجھی قرارداد پیش کریندے ہوئیں وزیرِ پارلیمانی امور ڈاکٹر طارق فضل چاودری آکھیا جو اسلامی جمہوریہ پاکستان دے دستور دے آرٹیکل 234 دی شق (1) دے تحت 11 اکتوبر 2026ء کوں صدرِ مملکت ولوں صوبہ خیبر پختونخوا اچ ہنگامی حالت دے اعلان کوں سانجھے اجلاس اسلامی جمہوریہ پاکستان دے دستور دے آرٹیکل 234 دی شق (3) دے تحت منظور کریندے۔ جیندے بعد ایوان اچ انہاں ݙوہیں قرارداداں تے بحث دا باقاعدہ آغاز تھیا۔