خیبر پختونخوا اچ دہشت گردی دے منڈھوں خاتمے تئیں اقدامات دا سلسلہ جاری رہسی، ڈاکٹر طارق فضل چوہدری

اسلام آباد۔15 اکتوبر (اے پی پی) وفاقی وزیر پارلیمانی امور ڈاکٹر طارق فضل چوہدری آکھیے جو حکومت خیبر پختونخوا اچ دہشت گردی دے خاتمے دا اٹل فیصلہ کرڳھدے تے صوبے اچ دہشت گردی دے مکمل خاتمے تئیں اقدامات دا سلسلہ جاری رہسی۔ پارلیمنٹ دے مشترکہ اجلاس اچ خیبر پختونخوا اچ ایمرجنسی دے نفاذ تے گورنر راج متعلق صدارتی احکامات دی منظوری کیتے پیش کیتی ڳئی قرارداداں تے بحث اچ حصہ گھندے انہاں آکھیا جو اے معاملہ کہیں دی فتح یا شکست دا نی بلکہ دہشت گردی مکاوݨ تے عوام دیاں جاناں دے تحفظ دا اے۔ڈاکٹر طارق فضل چوہدری کارروائی دے دوران سارے ارکان کوں اظہارِ خیال دا موقع ݙیوݨ تے سپیکر کوں خراجِ تحسین پیش کریندے آکھیا جو انہاں گزریل ݙینھ تے اڄ اوکھے حالات دے باوجود بالخصوص اپوزیشن ارکان کوں ڳالھ کرݨ دا موقع ݙتا جیڑھا جو قابلِ ستائش اے۔وفاقی وزیر آکھیا جو خیبر پختونخوا دی صورتحال تے اتھاں دہشت گردی دے حوالے نال پیش کیتے ڳئے اعداد و شمار کوں سامݨے رکھیندے ایمرجنسی دا نفاذ چھیکڑی آپشن دے طور تے کیتا ڳئے، حکومت گزریل ݙاہ توں پندرہ ݙینھ توں مسلسل اے آہدی پئی ہئی جو او ایمرجنسی دے نفاذ تے سنجیدگی نال غور کریندی پئی اے تے بعد اچ ایں سلسلے اچ ساریاں تیاریاں مکمل کر ڳھدیاں ڳئیاں ہن۔انہاں آکھیا جو دہشت گردی دے خلاف جنگ اچ مسلسل عدم تعاون، غیر سنجیدگی تے خیبر پختونخوا دی صوبائی قیادت دی طرفوں وفاقی حکومت کوں تعاون دا یقین نہ ݙیوائے ونجݨ پاروں ایمرجنسی نافذ کرݨ دا فیصلہ کیتا ڳیا۔ڈاکٹر طارق فضل چوہدری آکھیا جو خیبر پختونخوا اچ دہشت گردی دی سنگینی دا اندازہ لاوݨ کیتے شہید پولیس اہلکاراں تے پاک فوج دے شہداء دے اہلخانہ نال ملاقات کرݨی چاہیدی اے تاں توں پتہ لڳ سڳے جو اپݨے پیاریں دی قربانی ݙیوݨ آلے خاندان کیڑھے حالات توں گزردن۔ انہاں آکھیا جو خودکش حملیں اچ ھکے ویلھے، پندرہ تے 20 لوکاں دیاں شہادتاں ایں صورتحال دی سنگینی کوں ظاہر کریندین۔قائدِ حزبِ اختلاف دے خطاب تے ردِعمل ݙیندے وفاقی وزیر آکھیا جو او انہاں دا احترام کریندن تے انہاں کوں ہک تجربہ کار سیاستدان سمجھدن تاں جو چیئر کیتے اڄ استعمال کیتے ڳئے کجھ الفاظ نامناسب ہن تے اے نہ آکھیا ونڄݨا چاہیدا ہئی۔انہاں سپیکر دی طرفوں اپوزیشن ارکان دے پروڈکشن آرڈرز جاری کرݨ دی تعریف کریندے آکھیے جو انہاں کنے ایجھے پروڈکشن آرڈرز دی فہرست موجود اے جنہاں دے تحت جیلاں اچ قید اپوزیشن ارکان کوں ایوان اچ گھن آیا ڳئے۔انہاں آکھیا جو سپیکر جئیں جذبے تے فراخدلی دا مظاہرہ کیتا او قابلِ تحسین اے۔ وفاقی وزیر پارلیمانی امور آکھیا جو حکومت دہشت گردی دے مکمل خاتمے کیتے پرعزم اے تے ایں مقصد دے حصول تئیں اپݨے اقدامات جاری رکھیسی۔