حکومتِ پاکستان انسانی سمگلنگ تے غیر قانونی ٹریول ایجنٹاں دے خلاف گھیرا تنگ کرݙتے، وزیرِ مملکت داخلہ دا نیشنل رسک اینالیسس سمٹ نال خطاب

اسلام آباد۔15 اکتوبر(اے پی پی) وزیرِ مملکت داخلہ طلال چوہدری آکھیے جو حکومتِ پاکستان انسانی سمگلنگ تے غیر قانونی ٹریول ایجنٹاں دے خلاف گھیرا تنگ کرݙتے تے ایں حوالے نال پارلیمنٹ دے ذریعے قوانین کوں مزید سخت بݨایا ڳئے جئیں پاروں یورپ دے پاسے غیر قانونی امیگریشن اچ واضح کمی آئی اے۔او وفاقی تحقیقاتی ادارے (ایف آئی اے) تے بارڈر سکیورٹی و غیر قانونی امیگریشن دی مؤثر روک تھام کیتے انٹرنیشنل سینٹر فار مائیگریشن پالیسی ڈویلپمنٹ دی سانجھ نال اسلام آباد اچ منعقدہ ’’نیشنل رسک اینالیسس سمٹ‘‘ نال خطاب کریندے پئے ہن۔ اے تقریب یورپی یونین دے منصوبے “RAPAK II” (رسک اینالیسس پاکستان، فیز ٹو) دا ہک اہم سنگِ میل اے۔کانفرنس اچ یورپی یونین دے انٹرنل افیئرز تے مائیگریشن دے کمشنر میگنس برونر، وزیرِ مملکت داخلہ و انسدادِ منشیات طلال چوہدری، ڈائریکٹر جنرل ایف آئی اے ڈاکٹر عثمان انور، پاکستان اچ یورپی یونین دے سفیر، فرنٹیکس دے نمائندیں، قانون نافذ کرݨ آلے اداریں تے بین الاقوامی سفارتی شخصیات شرکت کیتی۔ایں موقع تے وزیرِ مملکت داخلہ آکھیا جو حکومتِ پاکستان انسانی سمگلنگ تے غیر قانونی ٹریول ایجنٹاں دے خلاف گھیرا تنگ کر ݙتے تے ایں حوالے نال پارلیمنٹ دے ذریعے قوانین کوں مزید سخت بݨایا ڳئے جئیں پاروں یورپ دے پاسے غیر قانونی امیگریشن اچ واضح کمی آئی اے۔ انہاں واضح کیتا جو اساݙا ہدف غیر قانونی سمگلنگ دے رستیں کوں مکمل طور تے مسدود کرݨا تے باضابطہ و قانونی ہجرت دے دروازے کھلے رکھݨ اے۔ڈائریکٹر جنرل ایف آئی اے ڈاکٹر عثمان انور شرکاء نال خطاب کریندے رسک اینالیسز یونٹ دیاں کامیابیاں دی تعریف کیتی تے ݙسایا جو یورپی یونین تے آئی سی ایم پی ڈی دے تعاون نال ایف آئی اے ایں رسک اینالیسز نظام کوں ملک دے سارے زونز تئیں وسعت ݙیوݨ تے عمل پیرااے۔ انہاں آکھیا جو جدید پروفائلنگ تے خطرات دی جانچ دے جدید ماڈلاں پاکستانی بارڈرز تے غیر قانونی نقل و حرکت روکݨ اچ کلیدی کردار ادا کیتے۔تقریب دے چھیکڑ اچ پاکستان دے متعلقہ سرحدی اداریں تے شراکت داراں وچال مربوط بارڈر مینجمنٹ دے سانجھے تعاون دی یادداشت تے باقاعدہ دستخط وی کیتے ڳئن۔