اسلام آباد۔16 اکتوبر (اے پی پی) وفاقی وزیربورڈ آف انویسٹمنٹ قیصر احمد شیخ اسلام آباد اچ ملائیشیا دے ہائی کمیشن اچ منعقدہ "ملائیشیا۔پاکستان بزنس انگیجمنٹ 2026: تجارت، سرمایہ کاری تے تجارتی رابطیں دا ودھارا" اچ بطور مہمانِ خصوصی شرکت کیتی۔ ایں موقع تے انہاں ݙوہیں بھرا ملکاں وچال اقتصادی تعاون کوں تکڑابݨاوݨ، ݙوطرفہ تجارت دے حجم اچ ودھارے تے سرمایہ کاری دے نویں موقع پیدا کرݨ کیتے پاکستان دے عزم …
پاکستان تے ملائیشیا وچال تجارتی و سرمایہ کاری رابطے مزید تکڑے بݨاوݨ تے اتفاق، وفاقی وزیر قیصر احمد شیخ دی ملائیشین سرمایہ کاراں کوں پاکستان اچ سرمایہ کاری دی دعوت
اسلام آباد۔16 اکتوبر (اے پی پی) وفاقی وزیربورڈ آف انویسٹمنٹ قیصر احمد شیخ اسلام آباد اچ ملائیشیا دے ہائی کمیشن اچ منعقدہ “ملائیشیا۔پاکستان بزنس انگیجمنٹ 2026: تجارت، سرمایہ کاری تے تجارتی رابطیں دا ودھارا” اچ بطور مہمانِ خصوصی شرکت کیتی۔ ایں موقع تے انہاں ݙوہیں بھرا ملکاں وچال اقتصادی تعاون کوں تکڑابݨاوݨ، ݙوطرفہ تجارت دے حجم اچ ودھارے تے سرمایہ کاری دے نویں موقع پیدا کرݨ کیتے پاکستان دے عزم دا اعادہ کیتا۔تقریب اچ سرکاری و نجی شعبیاں دے نمائندیں، تجارتی شخصتات، سرمایہ کاراں تے اقتصادی امور نال وابستہ اہم سٹیک ہولڈرز شرکت کیتی۔ ایں دا مقصد پاکستان تے ملائیشیا وچال تجارت، سرمایہ کاری تے تجارت نال تجارت دی سطح تے تعاون دے نویں امکانات تلاش کرݨا ہئی۔ پاکستان اچ ملائیشیا دے ہائی کمشنر سفیر داتو محمد اظہر مزلاں وفاقی وزیر دا خیرمقدم کیتا تے اپݨی مصروفیات اچوں ویلھا کڈھ تے تقریب اچ شرکت تے انہاں دا شکریہ ادا کیتا۔ انہاں پاکستان تے ملائیشیا دے پراݨے تے دوستانہ تعلقات کوں اجاگر کریندے تجارتی تے اقتصادی تعاون کوں مزید وسعت ݙیوݨ دے وسیع امکانات تے زور ݙتا۔ملائیشیا دے ہائی کمشنر اپݨے خطاب اچ آکھیا جو ݙوہیں ملکاں دی پراݨی دوستی کوں تکڑے تجارتی تے سرمایہ کاری شراکت داری اچ تبدیل کرݨ ویلھے دی اہم لوڑھ اے۔ انہاں جنوبی ایشیا اچ پاکستان دی تجارتی اہمیت دا ذکر کریندے ایں اعتماد دا اظہار کیتا جو تجارتی رابطیں اچ ودھارے تے نجی شعبے دی زیادہ فعال شرکت نال ݙوطرفہ تجارت کوں نمایاں طور تے ودھایا ونڄ سڳدے۔ انہاں ݙوطرفہ تجارت کوں تقریباً ݙڈھ ارب امریکی ڈالر توں گھن تے پنج ارب امریکی ڈالر تئیں گھن ونڄݨ دی خواہش دا اظہار کیتا۔سفیر داتو محمد اظہر مزلاں مصنوعی ذہانت، تعلیم، صنعت، چیزاں تے خدمات دے شعبیں کوں تعاون کیتے اہم قرار ݙتا تے آکھیا جو ملائیشیا پاکستان دی اقتصادی صلاحیت تے تزویراتی اہمیت کوں تسلیم کریندے۔ انہاں وسطی ایشیائی منڈیاں تئیں رسائی کیتے پاکستان دے جغرافیائی محلِ وقوع تے ایں دی جوان آبادی کوں مستقبل اچ اقتصادی تعاون دے اہم اثاثے قرار ݙتا۔ خوردنی تیل تے حلال مصنوعات دے شعبیں اچ موقعیں دا ذکر کریندے انہاں پاکستانی تجارتی شخصیات تے سرمایہ کاراں کوں ملائیشیا اچ سرمایہ کاری دی دعوت ݙتی۔ ایں ضمن اچ ملائیشیا اچ حلال جیلاٹن دی تیاری دے شعبے اچ پاکستانی سرمایہ کاری دی مثال ݙیندے انہاں ݙوہیں ملکاں وچال کامیاب تجارتی شراکت داری دے امکانات کوں اجاگر کیتا۔ہائی کمشنر ایں ڳالھ تے وی زور ݙتا جو ݙوہیں ملکاں دے اقتصادی رابطے سانجھے مفاد تے مشترکہ کامیابی دے اصول تے استوار ہووݨے چاہیدن۔ انہاں پاکستان کوں تجارت تے سرمایہ کاری کیتے ہک تزویراتی شراکت دار قرار ݙیندے مختلف شعبیں اچ تعاون دے مزید موقع تلاش کرݨ اچ ملائیشیا دی دلچسپی دا اظہار کیتا۔ وفاقی وزیر قیصر احمد شیخ اپݨے خطاب اچ ملائیشیا دے ہائی کمشنر تے ہائی کمیشن دا دعوت ݙیوݨ تے ݙوہیں ملکاں دی تجارتی برادری تے متعلقہ سٹیک ہولڈرز کوں ہک پلیٹ فارم تے جمع کرݨ تے شکریہ ادا کیتا۔
