اسلام آباد۔16 اکتوبر (اے پی پی) چیئرمین سینیٹ سید یوسف رضا گیلانی آکھیے جو پاکستان تے جرمنی وچال سفارتی تعلقات دے 75 سال سانجھے طور تے مفید تے مستقبل تے مبنی شراکت داری دی تکڑی بنیاد ہن، ݙوہیں ملک اقتصادی تعاون، سرمایہ کاری، تعلیم تے پارلیمانی رابطیں کوں مزید ودھارا ݙیون۔جرمنی دے قومی ݙینھ دے سلسلے اچ اسلام آباد اچ منعقدہ تقریب نال خطاب کریندے انہاں آکھیا جو پاکستان تے …
پاکستان تے جرمنی اقتصادی تعاون، سرمایہ کاری تے پارلیمانی رابطے مزید ودھاون ، چیئرمین سینیٹ سید یوسف رضا گیلانی
اسلام آباد۔16 اکتوبر (اے پی پی) چیئرمین سینیٹ سید یوسف رضا گیلانی آکھیے جو پاکستان تے جرمنی وچال سفارتی تعلقات دے 75 سال سانجھے طور تے مفید تے مستقبل تے مبنی شراکت داری دی تکڑی بنیاد ہن، ݙوہیں ملک اقتصادی تعاون، سرمایہ کاری، تعلیم تے پارلیمانی رابطیں کوں مزید ودھارا ݙیون۔جرمنی دے قومی ݙینھ دے سلسلے اچ اسلام آباد اچ منعقدہ تقریب نال خطاب کریندے انہاں آکھیا جو پاکستان تے جرمنی دے پراݨے دوستانہ تعلقات سانجھے احترام، اعتماد تے تعاون تے استوار ہن جݙاں جو جرمن یومِ اتحاد قومی یکجہتی، استقامت تے مشترکہ خوشحالی دی علامت اے۔ چیئرمین سینیٹ آکھیا جو علامہ محمد اقبال تے ڈاکٹر روتھ فاؤ دی خدمات پاکستان تے جرمنی دے تعلقات کوں مزید تقویت ݙتی۔ انہاں ترقیاتی شعبیں، ماحولیاتی اقدامات، خواتین کوں بااختیار بݨاوݨ تے انسانی ترقی کیتے جرمنی دے تعاون کوں قابلِ تحسین قرار ݙتا۔انہاں آکھیا جو جی ایس پی پلس سکیم دے تحت پاکستان دی مسلسل شمولیت کیتے جرمنی دی حمایت اہمیت رکھیندی اے، خصوصی اقتصادی زونز، قابلِ تجدید توانائی، اطلاعاتی ٹیکنالوجی تے صنعتی ترقی دے شعبیں اچ جرمن سرمایہ کاری دے وݙے موقع موجود ہن۔ سید یوسف رضا گیلانی ایں امر تے زور ݙتا جو پاکستان تے جرمنی وچال قدر افزاء مصنوعات دی تیاری، صنعتی ترقی تے تجارتی شراکت داری کوں ودھارا ݙتا ونڄے۔ انہاں آکھیا جو ٹیکنالوجی، تحقیق تے صنعتی شعبیں اچ دوطرفہ تعاون دے وسیع امکانات موجود ہن جنہاں توں ݙوہیں ملک فیدہ چاسڳدن۔ انہاں آکھیا جو جرمن یونیورسٹیاں اچ پاکستانی طلبہ دی ودھدی موجودگی ݙوہیں ملکاں دے تکڑے عوامی رابطیں کوں ظاہر کریندی اے ۔ انہاں پاکستانی طلبہ تے خانداناں دے ول ملاپ دے ویزیں اچ تاخیر متعلق مسئلیں تے توجہ ݙیوݨ دی لوڑھ تے وی زور ݙتا۔ چیئرمین سینیٹ ہنرمند افرادی قوت دی نقل و حرکت دے شعبے اچ پاکستان تے جرمنی وچال تعاون کوں چنڳاں قرار ݙیندے آکھیے جو ݙوہیں ملکاں وچال تعلیمی تے پیشہ ورانہ رابطیں کوں مزید مستحکم کیتا ونڄݨا چاہیدے۔انہاں آکھیا جو پاکستان تے جرمنی دی پارلیماناں وچال باقاعدہ رابطے تے نیڑے مشاورت امن و استحکام دے ودھارے اچ مددگار ثابت تھی سڳدی اے، ݙوہیں ملک عالمی تے علاقائی امور تے پارلیمانی رابطیں کوں مزید تکڑا بݨاون تاں جو سانجھی افہام و تفہیم تے تعاون ودھایا ونڄ سڳے۔ چیئرمین سینیٹ جرمن قیادت کوں پاکستان دے دورے دی دعوت ݙیندے آکھیا جو مسلسل رابطیں تے اعلیٰ سطح دے تبادلیں نال ݙوہیں ملکاں دی شراکت داری مزید مؤثر تے تکڑی تھیسی۔
