اسلام آباد ۔ 15 ستمبر (اے پی پی) وزیراعظم عمران خان دی زیرصدارت وفاقی کابینہ دا اجلاس تھئے جیندے اچ ارکان پارلیمنٹ دے حلف سانگے الیکٹورل ایکٹ اچ ترامیم، مشکوک پائلٹاں دی لائسنس منسوخی ،مختلف بیماریاں دی دوادا ملھ سودھا کئی تقرریاں دی منظوری ڈتی گئی۔وزیراطلاعات و نشریات شبلی فراز آکھیے جو کرونا بارے حکومت دی کامیاب حکمت عملی نال تعلیمی ادارے ولا کھلدے پین،موٹروے جھیں واقعہ توں بچنڑ کیتے نویں قانون سازی کیتی ویسی،نوازشریف عدالتی فیصلہ دا احترام کریندے ول آون۔اے گالھ وفاقی وزیر اطلاعات و نشریات سینیٹر شبلی فرازاسلام آباد اچ وفاقی کابینہ دے اجلاس دے بعد میڈیا بریفنگ اچ آکھی۔انہاں آکھیے جو سینیٹ، قومی اتے صوبائی اسمبلیاں دے اراکین دے حلف کیتے 60 توں 90ڈینھ دی مدت رکھنڑ کیتے الیکٹورل ایکٹ اچ ترامیم، مشکوک لائسنساں آلے بئے 22 پائلٹس دی لائسنس منسوخی ،اینٹی ملیریئل ڈرگ، حفاظتی لباس برآمد کرنڑ، انفلوئنزا، کینسر سودھا بیاں زندگی بچاونڑ آلیاں مختلف 250 ادویات دی ریٹیل پرائسنگ اتے مختلف تقرریاں دی منظوری ڈتی گئی اے اتے گرین ایریاز بحال کرنڑ دی ہدایت کیتی اے جڈاں جو وزیر اعظم بارشاں اتے سیلاب نال متاثرہ مستحق خانداناں کوں احساس پروگرام دے تحت امداد ڈیونڑ دی وی ہدایت کیتی اے ۔کابینہ انفارمیشن اینڈ کمیونیکیشن ٹیکنالوجی دے شعبہ اچ وزارتِ انفارمیشن ٹیکنالوجی اینڈ کمیونیکیشن اتے چین دی منسٹری آف انڈسٹری اینڈ انفارمیشن ٹیکنالوجی وچال ایم او یو دی منظوری ڈتی۔وفاقی وزیر سینیٹر شبلی فرازآکھیا جو سکول ولا کھلدے پین، استاد اتے والدین کرونا سانگے ایس او پیزتے عمل کرن،معاشی توں بعد تعلیمی سرگرمیاں بحال تھیونڑ ہک ودی کامیابی اے۔شبلی فراز آکھیا جو موٹروے واقعہ افسوسناک اے جیندے تے پوری قوم کوں چنتا اے اتے کاوڑ اے،ایں سانگے نویں قانون سازی کیتی ویسی،جیکر 2013اچ ہی ایں ملزم دے خلاف کارروائی تھیندی تاں اج ایویں نہ تھیندا،شہباز شریف توں پچھو اوں ویلھے ڈھیل کیوں ہئی،جیکر نوازشریف کوں عدالت دا کجھ وی احساس اے تاں فیصلے دا احترام کریندے وطن ول اون،بھل انہاں دے اثاثے وی باھرو ہین اتے ایں ٹبر دے بئے لوک وی باھر بھجنڑ دے چکر اچ ہین۔
