اسلام آباد۔13اکتوبر (اے پی پی) وزیر خارجہ شاہ محمود قریشی افغانستان اچ سلامتی، استحکام اتے اجتماعیت دے حامل سیاسی تصفیے دی لوڑھ تے زور ݙیندیں ہوئیں آکھیا جو افغانستان اچ تکھے ابھردے ہوئے انسانی بحران نال نبڑݨ کیتے عالمی برادری کوں ہنگامی بنیاداں تے ٹھوس اقدامات کرݨے پوسن۔ دفتر خارجہ دے ترجمان دے مطابق نیوزی لینڈ دی وزیر خارجہ ننایا مہوٹا بدھ کوں آپݨے پاکستانی ہم منصب شاہ محمود قریشی نال ویڈیو لنک تے رابطہ کیتا۔ ݙوہیں وزرائے خارجہ وچال ݙو پاسہ تعلقات ، علاقائی خصوصی طور افغانستان دی ابھردی ہوئی صورتحال تے ڳالھ مہاڑ تھئی۔ وزیر خارجہ افغانستان اچ سلامتی، استحکام اتے اجتماعیت دے حامل سیاسی تصفیے دی لوڑھ تے زور ݙتا اتے آکھیا جو افغانستان اچ تکھے ابھردے ہوئے انسانی بحران نال نبڑݨ اتے افغانستان دی انسانی اتے معاشی تعاون کیتے عالمی برادری کوں ہنگامی بنیاداں تے اقدامات کرݨے پوسن۔ نیوزی لینڈ دی وزیر خارجہ نیوزی لینڈ سودھے مختلف ملکاں دے شہریاں کوں کابل توں محفوظ انخلاء اچ تعاون کرݨ تے وزیر خارجہ مخدوم شاہ محمود قریشی اتے پاکستان دی قیادت دا شکریہ ادا کیتا۔
