اسلام آباد۔13اکتوبر(اے پی پی)وزیر مملکت زرتاج گل، وزیراعظم دے معاون خصوصی ڈاکٹر شہبازگل اتے ملیکہ بخاری آکھیے جو نوازشریف ٹٻر ووٹ، کوٹ اتے قوانین دا احترام کریندے ہوئے اپݨے مقدمات دا سامݨا کرے، شریف ٹٻر 25 ارب روپے دی منی لانڈرنگ دا حساب کتاب ݙیون، قوم انہاں دی ٻئی ڈرامہ بازی برداشت نئیں کر سڳدی، مریم نواز او خود پسند تریمت ہین جیندی سیاست صرف اقتدار اے، او پاکستان دی سالمیت، سرحداں دے محافظ، انصاف دے اداریاں اتے منتخب وزیراعظم کوں اپݨے ذاتی مفاد کیتے نشانہ ٻݨیدی اے، اے اپݨے پیو آلی کار ہر ادارے تے قبضے دے سیاست کوں اڳو ٹورݨ چاہندی اے، اے سزا یافتہ تریمت اے جیندی ضمانت منسوخ تھیوݨی چاہیدی اے، عدالتاں دے ٻاھرو تقریراں دی بجائے مریم نواز ایون فیلڈ اپارٹمنٹ دی رسیداں ݙیون، نوازشریف ڄھیاں کوڑا، مکار اتے بددیانت ٻیا کوئی تھی وی نئیں سڳدا، پاکستان کوں بحران توں صرف عمران خان کݙھ سڳدن۔ او اسلام آباد اچ پریس کانفرنس کریندے پئے ہن۔ وزیر مملکت برائے موسمیاتی تبدیلی زرتاج گل وزیر آکھیا جو مریم نواز دا کوئی سیاسی قد کاعنی، او صرف ہک مصدقہ چورنی اے جیندے اعمالیں پاروں ن لیگ کوں سینیٹ، کشمیر، گلگت بلتستان اتے ہر ڄاہ تے شکست ݙیکھݨی پئی اے، مریم دی سنڄاݨ اے ہے جو مائی پاکستان توں چوری اتے منی لانڈرنگ کیتی، چوری اچ نواز شریف دی سنڄھ رہی تہوں ایکوں سزا وی تھئی اے، ایں مائی کوں حالی سیاسی تربیت دی لوڑھ اے۔ پارلیمانی سیکرٹری ملیکہ بخاری آکھیے جو مریم نواز ملکی اداریاں دے خلاف بدزبانی کرتے اپݨی چوری نئیں لکا سڳدی، اساں آئینی اداریاں کوں متنازعہ نہ ٻݨاوݨ ݙیسوں۔
