اسلام آباد۔14اکتوبر (اے پی پی):چیئرمین سینیٹ محمد صادق سنجرانی آکھیے جو پاکستان کوریا دے نال تجارت کوں مزید ودھاوݨ چاہندے ، کوریا کوں سی پیک منصوبیں اتےعلاقائی رابطے ودھاوݨ کیتے خصوصی اقتصادی زونز اچ وی سرمایہ کاری توں فیدہ چاوݨا چاہیدے ، اے ڳال انہاں جنوبی کوریا دے سفیر نال ڳال مہاڑ کریندے ہوئیں آکھی اے ، جنہاں خمیس کوں پارلیمنٹ ہاوس اچ انہاں نال ملاقات کیتی ۔ ملاقات اچ سانجھی دلچسپی دے امور سودھے ݙوطرفہ تعلقات اتے علاقائی صورتحال تے ڳال مہاڑ کیتی ڳئی ۔ چیئرمین سینیٹ صادق سنجرانی آکھیے جو پاکستان دے لوک کوریا دے نال تعلقات کوں انتہائی عزت دی نگاہ نال ݙیکھدوں ، جنوبی کوریا دا امن، جمہوریت اتے خوشحالی دے رستے تے سفر قابل تحسین اے۔ انہاں آکھیے جو کجھ دہائیاں دے قلیل عرصے اچ کوریا خود کوں تکنیکی لحاظ نال ترقی یافتہ معیشت اچ بدال ݙتے ، پاکستان جنوبی کوریا دے نال آپݨے کثیر الجہتی تعلقات کوں اہمیت ݙیندے جیں دے وچ سانجھے تعاون دے سیاسی، اقتصادی، سائنسی، دفاعی، ثقافتی اتے بئے شعبے شامل ہن ۔
