آئی ٹی ایکسپورٹ ودھاوݨ دی حکمت عملی دا اعلان ،آندے ترائے سالیں اچ آئی ٹی ایکسپورٹ دے حجم کوں 10 ارب ڈالر تئیں ودھایا ویسی، ڈاکٹر عمر سیف

اسلام آباد۔23نومبر  (اے پی پی) نگران  وزیر انفارمیشن ٹیکنالوجی تے ٹیلی کمیونیکیشن ڈاکٹر عمر سیف پاکستان دی آئی ٹی ایکسپورٹ ودھاوݨ دی حکمت عملی دا اعلان کر ݙتے جئیں دے تحت آندے ترائے سالیں اچ آئی ٹی ایکسپورٹ دے حجم  کوں  10 ارب ڈالر تئیں ودھایا ویسی۔ خمیس کوں اسلام آباد دی مقامی ہوٹل اچ سٹریٹجی رپورٹ دے اجراء دی تقریب توں مزمان خصوصی دے طور آپݨے خطاب اچ ڈاکٹر عمر سیف آکھیا جو آئی ٹی سیکٹر واحد شعبہ اے جیڑھا پاکستان دی معیشت دے استحکام اچ مرکزی کردار ادا کر سڳدے۔ ایں سیکٹر کوں فعال کرݨ اتے محکمانہ رکاوٹاں دور کرݨ اچ ایس آئی ایف سی دا مرکزی کردار اے۔ اسپیشل انویسٹمنٹ فیسیلی ٹیشن کونسل دا فورم پاکستان اچ عالمی سرمایہ کاری کیتے راہ سوکھا کریسی۔ انہاں ݙسیا جو رپورٹ آکسفورڈ یونیورسٹی اتے پرائس واٹر ہاؤس کُوپر دی سانجھ نال ٻݨائی ڳئی اتے ایں حکمت عملی اچ پاکستان سافٹ ویئر ایکسپورٹ بورڈ اتے آئی ٹی ایسوسی ایشن دا مرکزی کردار تھیسی۔ ڈاکٹر عمر سیف آئی ٹی برآمدات ودھاوݨ دی حکمت عملی بارے ݙسیا جو ایں ویلھے سرکاری اعدادوشمار موجب آئی ٹی ایکسپورٹ 2 ارب 60 کروڑ ڈالر اے اتے اساں موجودہ آئی ٹی ورک فورس اچ ٻئے ݙو لکھ ہنرمنداں دا ودھارا کریسوں جئیں نال ایکسپورٹ 5 ارب ڈالرز تئیں ودھسی۔