اسلام آباد۔11جون(اے پی پی):وزیراعظم محمد شہباز شریف وفاقی کابینہ کوں اپݨے دورہ چین دا ݙسایا جیندے اچ سی پیک دے ݙوڄھے مرحلے اچ اڳونہی تھئی اے، ایں سانڳے پاک-چین تعاون ٻیا ودھاوݨ کیتے تیکھے ہک اعلیٰ سطح چینی حکام دا وفد پاکستان دا دورہ کریسی۔ او اسلام آباد اچ وفاقی کابینہ دے اجلاس دی اڳواݨی کریندے پئے ہن۔ انہان چین اچ چینی قیادت نال ملاقاتاں، پاکستان-چین بزنس فورم اچ پاکستانی اتے چینی کاروباری و سرمایہ کاراں وچال ہزار توں ودھ بی ٹو بی ملاقاتاں دا ݙسائے۔ انہاں چین نال ݙوطرفہ تعلقات، اقتصادی و سٹرٹیجک شراکت داری تے ڳالھ مہاڑ دا ݙسایا۔ کابینہ اسٹیبلشمنٹ ڈویژن دی سفارش تے نیشنل سکول فار پبلک پالیسی(این ایس پی پی ) دے بورڈ آف گورنرز اچ نجی و تعلیمی شعبے توں ممبران دی تعیناتی دی منظوری ݙتی۔ وفاقی کابینہ وزارتِ انسانی حقوق دی سفارش تے اسلام آباد کیتے نیشنل کمیشن فار ہیومین رائیٹس(این سی ایچ آر ) دے رکن دی تعیناتی دا عمل شروع کرݨ اتے ایں سانڳے کابینہ کمیٹی ٻݨاوݨ دی منظوری ݙتی۔ کابینہ ڈیجیٹل نیشن پاکستان ایکٹ 2024 دی اصولی منظوری ݙیندے ایندے تے وزارتِ قانون و انصاف کوں ضروری نظر ثانی دی ہدایت کیتی۔ نیشنل ڈیجیٹل کمیشن پالیسی ساز ادارہ ہوسی ڄیڑھا وفاقی و صوبائی ممبران دا ہوسی اتے ایندی اڳواݨی وزیراعظم آپ کریسن۔ وفاقی کابینہ ثالثی قانون (دی آربیٹریشن بل 2024) دے مسودے تے ضروری قانون سازی دی اصولی منظوری ݙتی جو ایندے کیتے صوبیاں نال وی صلاح کیتی ونڄے۔ کابینہ قومی احتساب بیورو اتے سری لنکا دے ادارے کمیشن ٹو انویسٹی گیٹ ایلی گیشنز آف برائبری/ کرپشن (سی آئی اے بی او سی) وچال مفاہمتی یادداشت تے دستخط دی منظوری ݙتی۔ وفاقی کابینہ سرکاری ملکیتی اداریاں بارے کابینہ کمیٹی دے 13 اتے 20 مئی2024 کوں تھیوݨ آلے اجلاساں دے فیصلاں دی وی توثیق کیتی۔ وفاقی کابینہ اقتصادی رابطہ کمیٹی دے 23 اتے27 مئی دے اجلاساں اچ فیصلاں دی وی توثیق کیتی۔
