اسلام آباد۔11جون(اے پی پی):وزیراعظم محمد شہباز شریف صوبائی حکومتاں کوں بجلی چوری اتے اوور بلنگ روکݨ، تقسیم کار کمپنیاں اچ صارفین دی سہولت دا موثر نظام ٻݨاوݨ دی ہدایت کیتی اے۔ او اسلام آباد اچ بجلی دی لوڈ شیڈنگ، بجلی چوری روکݨ اتے توانائی دے شعبے اچ اصلاحات بارے جائزہ اجلاس دی صدارت کریندے پئے ہن۔ اجلاس اچ وفاقی وزیر برائے اقتصادی امور احد خان چیمہ، وفاقی وزیر توانائی سردار اویس لغاری، وفاقی وزیر پٹرولیم ڈاکٹر مصدق ملک، وزیراعظم دے کوآرڈینیٹر رانا احسن افضال اتے متعلقہ وزارتاں دے اعلیٰ افسران شرکت کیتی۔ اجلاس اچ ملکی سطح تے بجلی دی طلب و رسد اتے لوڈ شیڈنگ دے رجحانات تے بریفنگ ݙتی گئی۔ وزیراعظم ہدایت کیتی جو بجلی نا ملݨ بارے شکایات ویلھے تے نمٹایاں ونڄن، ودھدی گرمی پاروں ملک اچ ڳھٹ توں ڳھٹ لوڈ شیڈنگ کیتی ونڄے، نویں ٹرانسفارمرز صرف عالمی معیار دے ہووݨے چاہیدن، توانائی دے شعبے اچ اصلاحات کیتے عالمی سطح تے رائج جدید نظام توں فیدہ چاتا ونڄے، بجلی چاری ناقابل برداشت اے، اوور بلنگ نئیں تھیوݨی چاہیدی۔ اجلاس اچ نیشنل ٹرانسمیشن اینڈ ڈسپیچ کمپنی دی تنظیم نو دی اڳونہی تے بریفنگ ݙتی گئی۔ اجلاس اچ بجلی چوری روکݨ دی مہم دا وی ݙسایا ڳیا ڄیڑھی صوبیاں دے ڳانݙھے نال کامیابی نال جاری اے۔
