نوازشریف دا اے سی لہاوݨ آلے اڄ مظلومیت کارڈ نہ کھیݙن ، وزیر اطلاعات عظمی بخاری

لاہور۔14جون(اے پی پی):وزیر اطلاعات پنجاب عظمی بخاری آکھیے مسلم لیگ(ن) دی لیڈرشپ انتقام دی سیاست تے یقین نی رکھیندی ۔ جمعہ کوں بیرسٹر سیف دے بیان تے ردعمل اچ انہاں آکھیے جو بانی پی ٹی آئی جیل اچ چنڳے کھاݨے کھاندے پئن انہاں سانڳے 6 سیل انڄ خالی کرائے ڳئن ،8 مہینے اچ بانی پی ٹی آئی 288 لوکاں نال ملاقاتاں کیتن ، انھاں نال انہاں دی فیملی اتے انہاں دے وکیل ہفتے اچ ترائے ݙینھ ملاقاتاں کریندن ۔ عظمی بخاری آکھیے محمد نوازشریف نال صرف ہفتے اچ ھک ݙینھ ہی ملاقات دی اجازت ہوندی ہئی ۔ بانی پی ٹی آئی تے بشری بی بی سانڳے او ساریاں سہولتاں ہن جیڑھے وی وی آئی پیز کوں ملدن ۔ نوازشریف دا اے سی لہاوݨ آلے اڄ مظلومیت کارڈ نہ کھیݙن ۔محمد نوازشریف آکھ ݙتے جو میݙی طرفوں اے ݙو اے سی لواون میکوں انہاں اچ کوئی دلچسپی کائنی ۔ وزیر اطلاعات آکھیے مسلم لیگ( ن) دی لیڈرشپ انتقام دی سیاست تے یقین نی رکھیندی ،بانی پی ٹی آئی تے بشری بی بی اپݨی چوریاں دی وجہ توں اڄ جیل اچ ہن پنج سال اساں توں رسیداں منڳݨ آلیں دی آپݨی واری آئی اے تاں گھڑیاں،ہیرے دی انگوٹھیاں اتے 190 ملین پاونڈز دیاں رسیداں پیش نی کرسڳدے۔